Вонредните парламентарни избори не' чинеа 3 млн. евра
„Платите“ на изборната администрација изедоа 1,6 млн. евра
Вонредните парламентарни избори што се одржаа на 1 јуни годинава ја чинеа државата 186 милиони денари или малку повеќе од три милиони евра.
Вака пресметала Државната изборна комисија, која шест месеци по предвремениот натпревар за пратеници конечно поднесе писмен отчет до Собранието со финансиски преглед за сите трошоци. Извештајот, според Изборниот законик, треба да биде објавен и на веб-страницата на ДИК www.dik.mk.
Во отчетот на ДИК, меѓу другото, стои дека „платите“ на изборната администрација изеле половина од вкупните трошоци. На оваа ставка ДИК префрлила најмногу пари, 99 милиони денари или 1,6 милиони евра. Станува збор за надоместоци и за превоз на денот на изборите што се исплатени на претседатели, членови и на заменици во 84 општински комисии и во 2.976 одбори.
На изборниот материјал, печатење гласачки ливчиња, повеќејазични обрасци, листи на кандидати, упатства и записници, примена на двојазичност, прегласување... се потрошени 67 милиони денари или 1,1 милион евра.
Во вкупниот изборен трошок влегуваат и 6,5 милиони денари за компјутерскиот центар, прес-центарот и помошното тело на ДИК, како и 14 милиони денари за организаторите на изборната кампања.
Во документот што треба да го разгледаат пратениците, Државната изборна комисија нагласува дека била штедлива и дека „рационално и економично ги реализирала буџетските средства“.
Од одобрените 250 милиони денари, за изборите 2008 се потрошени 186 милиони денари, односно 74,4 проценти. Тоа значи дека се заштедени еден милион евра кои вообичаено се враќаат во Буџетот.
Колку за споредба, за редовните парламентарни избори во 2006 беа предвидени 3,7 милиони евра, а потрошени 1,9 милиони евра. Најскапите избори ќе се случат наредната година, затоа што ќе имаме двоен циклус, претседателски и локалн�� избори во еден ден и можност за втор круг. Затоа ќе бидат потребни повеќе пари. За ова гласање во најновиот и досега најтежок народен паричник се предвидени дури 400 милиони денари или 6,5 милиони евра. (К.Ч.) |
