Андов се повлече, Борче Стојановски нов претседател на ЛП
Ќе инсистираме опозицијата да направи договор со власта и поскоро да се врати во парламентот, вели Андов
Либералната партија со која досега раководеше Стојан Андов на саботниот Конгрес избра нов лидер и Претседателство. Поранешниот лидер Стојан Андов и неговиот наследник Борче Стојановски велат дека ќе соработуваат и со власта и со опозицијата заради иднината на државата. „Ние ќе соработуваме и со власта и ќе инсистираме опозицијата да направи договор со власта и поскоро да се врати во парламентот“, рече Андов, додавајќи дека треба да се има разбирање и за некои потези на опозицијата.
Либералната партија ја поддржува иницијативата за враќање на имотите на Македонците од Егејска Македонија. Тоа, велат, бил проект зацртан уште во 2004 година, кој мора да се реализира, бидејќи станува збор за нечии човекови права.
Стојановски изјави дека овој конгрес е сосема легален и оти, конечно, ќе има внатрепартиско помирување.
„Со овој конгрес ги расчистивме односите и сега одиме во правец на рехабилитирање на членството и базата. Како партија од центарот сме отворени за соработка со сите политички партии и на власт и на опозицијата и ќе отвориме разговори со сите што се подготвени да разговараат со нас“, вели Стојановски.
Тој беше едногласно избран за претседател на либералите на 9. Конгрес на партијата. На него не присуствуваше блокот предводен од Зоран Крстевски и Љупчо Мешков. Тие најавуваат паралелен конгрес на Либералната партија, кој ќе се одржи идната недела во Свети Николе. |
