Си велам

Дојава и вториот тројански коњ

Ерол Ризаов

Едностран прекин на преговорите за името најмногу и' одговара на Грција

Пред вратите на Македонија Елините, нашите комшии, го поставија и вториот тројански коњ. Тоа е идејата за прекин на разговорите (преговорите) со Грција за изнаоѓање заедничко прифатливо решение за името на државата. Веднаш се најдоа дежурни македонствујучи загрижени личности и организации што го внесоа коњот внатре и сега водат жално смешни дебати главно на истомисленици за безусловен прекин на преговорите со Грција. Мудрите оратори, кои енергично бараат да се затвори прашањето за името, нели, никој нема право да преговара за најсветата македонска работа, се луѓе блиски на власта. Тие, ѓомити, вршат притисок врз Владата да ги запре безусловно преговорите веднаш. Експресно им одговара премиерот Никола Груевски дека сега не е добро да се прекинат преговорите, но разговорите со Грција ќе се водат многу, многу внимателно.

Прекинати преговори со Грција се вториот тројански коњ на грчките разузнавачки служби и на домашните патриоти и нови првоборци. Првиот тројански коњ беше Александар Македонски и антикоманијата по што Македонија се даде во силна потрага, политички стимулирана од власта, да се обезбеди славно минато и побогата историја. Почна ново толкување на античката историја со преименување на скопскиот аеродром, Градскиот стадион во Скопје, автопатот Е-75, кој така се вика со илјадници километри, освен неполни 200 км што поминуваат низ Македонија, почна да се нарачуваат во Италија грандиозни и скапи споменици на антички јунаци, никнаа низ центарот на Скопје антички колонади, чудни зданија што никогаш не припаѓале на ова поднебје што покрај засилување на големите комплекси на малите народи, предизвика и сериозно нарушување на член 7 од Привремената спогодба со Грција, која санкционира вакви ситуации што можат да се толкуваат како провокација. Копачите на Паско Кузман низ Македонија во потрага по антички артефакти и докази за потеклото на древните Македонци и нивниот континуитет со денешните Македонци се претвори во најголема македонска државна компанија со 3.000 вработени, кои Владата ги плаќаше со наши пари без да праша некој. Копачите на историјата не ископаа посветло минато, туку не' закопаа сите во неизвесна иднина. Тоа ги отвори вратите на Грција да не го почитува член 11 од Привремената спогодба, кој и' гарантираше на Македонија пристап до ЕУ и до НАТО без можност за спречување од страна на Грција во нашите евроатлански аспирации, со привремената референца, Поранешна југословенска Република Македонија. Во Букурешт ја почувствуваме оваа горчлива неправда на која светот остана глув. Најголемиот жив историчар во светот, Ерик Хобсбаум, кој од поодамна го цитирам, ни беше исклучително наклонет поради потврдената историска вистина. Неговото предавање во 2004 година пред студентите на Централноевропскиот универзитет во Будимпешта е многу значајно за народите на цела Источна Европа, а еден дел особено за Македонија. Хобсбаум на тоа предавање децидно кажува: „Најголемата идеолошка злоупотреба на историјата се потпира повеќе на анахронизмот отколку на лаги. Грчкиот национализам и' одбива на Македонија дури и право на име... Како и се' во случајот со Македонија, и тоа е далеку од академско прашање. Им треба голема храброст на грчките интелектуалци да го кажат тоа. Од аспект на историјата, тоа е вистинска глупост. Но, Хобсбаум не' предупредува и нас: „Поради непристрасност и екстремниот македонски емигрантски национализам, исто така, треба да се отфрли“. Денес шест години по неговото предупредување, целосно се обистини стравувањето на Хобсбаум. Таа опасност дојде во Македонија најмногу од нашата уважена дијаспора. Власта бланко со двете раце прифати дека сме внуци на Александар Македонски што предизвика конфузија во свеста на дел од македонските граѓани. Ваквото самоубиствено трагање по антички корени, политички стимулирано, предизвика речиси целиот светски научен врв да се сврти против Македонија.

И сега повторно пред вратата ни е вториот тројански коњ. Македонците најмногу се палат на антика. Дали сте се прашале кому во моментот најмногу му одговара безусловниот прекин на преговорите со соседна Грција. Предлагачите на генијалната идеја не нудат ни една друга алтернатива што и каде натаму. Главните иницијатори на оваа идеја веќе од поодамна избрале своја алтернатива, а тоа се Америка, Канада, Австралија, Нов Зеланд или некоја од земјите на Западна Европа. Во таа пригода некои од нив си ги смениле и своите лични имиња. Ете такви луѓе што не успеале да си го зачуваат своето име бараат безусловен прекин на преговорите бранејќи го на тој начин името на државата. И на почетник во политиката му е сосема јасно дека во моментот најмногу на Грција и' одговара прекин на преговорите. Со таков самоубиствен чин Грција целосно се амнестира од одговорноста за притисокот што го врши врз Македонија и што го повредува меѓународното право. Европа и Брисел, исто така, нема многу да се потресат од прекинот на преговорите дури тоа ќе го примат со олеснување, бидејќи не мора повеќе да го вадат жешкиот костен од огнот што го разгорува Грција. Не е баш пријатно кога со една членка на НАТО и на ЕУ мора да бида�� солидарни и кога таа на очиглед на светот не е во право. Со едностраниот прекин на преговорите на Македонија ќе и' се нанесе огромна и непроценлива штета, се разбира, доколку ваквите увезени идеи бидат прифатени од Владата и од парламентот на Република Македонија.

Денес се појавуваат и разни други емисари, но и директни учесници во историските настани околу признавањето на Македонија и нејзиното членство во ОН, кои пласираат дезинформации во јавноста дека Македонија можела многу лесно да биде примена во ОН со своето уставно име доколку поднесела барање како една од републиките што биле составен дел на Југославија, која била основач на Обединетите нации. Некои од учесниците во овие настани сега поради партиски и лични интереси манипулираат со јавноста, иако добро ги знаат ставовите на некои од земјите постојани членки на Советот за безбедност, кои веднаш најавија вето за ваквиот предлог. Замислете, проблемот бил во тоа што политичките противници на сегашната власт не знаеле или не сакале намерно правилно да го напишат барањето до Обединетите нации за прием со уставното име. Да го направ��ле тоа, работата ќе била одамна завршена. Боже, боже, да се крсти човек со две раце. Ова не го кажуваат наивни луѓе. Туку тие нас не' прават будали. И гледам прилично успеваат во тоа. Алал вера.