ВМРО-ДПМНЕ ќе слави на улица

Прославата поместена два дена порано и нема да се совпадне со Министерскиот совет на ЕУ

Оливера Војновска

Прославата на роденденот на најголемата десничарска партија во Македонија нема да се совпадне со министерскиот состанок на ЕУ на 17 и на 18 јуни во Брисел, каде што ќе се одлучува за напредокот на Македонија во евроинтеграциите. Дводецениското постоење на партијата ВМРО-ДПМНЕ ќе го одбележи на 15, наместо на 17 јуни во центарот на Скопје на улицата „Димитрија Чуповски“ (Вељко Влаховиќ).

Роденденската забава ќе се случува пред раскрсницата во близина на ресторанот „Мекдоналдс“, каде што ќе биде поставена голема бина. Славењето ќе почне во 20 часот со културно-уметничка програма, а, се разбира, на присутните ќе им се обрати премиерот и лидер на десницата, Никола Груевски.

Оваа фреквентна сообраќајница ќе биде затворена за сообраќај најмалку четири часа, и тоа на потегот од раскрсницата кај ТЦ „Палома Бјанка“ до Градската болница. Прославата најавена за вторник практично е своевидна кулминација на 50-дневното одбележување на 20-годишнината од формирањето на ВМРО-ДПМНЕ, под мотото „За татковината се работи“.

Но, зошто ВМРО-ДПМНЕ во последен момент го смени првичниот план централната манифестација да биде два дена порано? И зошто наспроти најавите (неофицијални) дека ќе има грандиозно славење на „Арената Филип Втори“ (Градски стадион), сепак, се одлучи да прославува на улица?

Во партијата велат дека причина за поместувањето на прославата е тоа што Груевски на 16 јуни ќе патува за Брисел за да присуствува на состанокот на европските народни партии, кој традиционално се одржува во исто време кога заседава и Советот на министри на ЕУ. Од ВМРО-ДПМНЕ ги отфрлаат шпекулациите дека Груевски од митингот сака да испрати пораки до странците во очи на состанокот во Брисел. „Груевски ќе зборува за се' што направила и што постигнала ВМРО-ДПМНЕ во овие 20 години“, велат високи партиски функционери и додаваат дека нема да има критики до меѓународната заедница. Според истите извори, со оглед на тоа што не се очекува вестите од Брисел да бидат поволни за Македонија, во најмала мера ќе изгледа невкусно владејачката партија да прославува.

Од партијата, исто така, тврдат дека најголемиот стадион во државата не бил посочуван како локација за одбележување на годишнината. Иако партиски активисти веќе десетина дена преку социјалната мрежа „Фејсбук“ повикуваа на масовно присуство на 17 јуни на „Арената Филип Втори“. „Сакавме прослава на отворено, но никогаш не сме кажале дека ќе славиме на стадион. На плоштадот „Македонија“ има градежни работи и е невозможно да се организира народен собир. Одлучивме да биде тоа во центарот на Скопје“, велат во ВМРО-ДПМНЕ. Оттаму негираат дека стравувале оти нема да можат да го наполнат скопскиот стадион (околу 40.000 луѓе). Според некои процени, локацијата што ја одбра ВМРО-ДПМНЕ за прославување може најмногу да собере околу 15.000 лица.

Инаку, ВМРО-ДПМНЕ никогаш досега не го поместил�� роденденското празнување и прв пат ќе го прави тоа на улица, наместо на плоштад или во сала. (О.В.)