МАНУ се огради од академик Ристовски

Извршниот одбор на Претседателството на МАНУ вчера се огради од неовластената промоција на акад. Блаже Ристовски на повлечената енциклопедија во Украина. Во Киев, како што велат, академик Ристовски престојувал на покана на Националната академија на науките на Украина и од Институтот за уметност, фолклор и етнологија при НАНУ.

Престојот на акад. Ристовски во Киев бил одобрен од Извршниот одбор на МАНУ, врз основа на негово барање, исклучиво со цел да присуствува на Славистичката конференција на НАНУ, да врши архивско-библиотечни истражувања во Киев и да присуствува на промоцијата на списанието „Народно творештво и етнографија“, посветено на македонскиот фолклор.

Меѓутоа, „што се однесува до презентацијата на македонската енциклопедија во Киев, академик Ристовски, како што и самиот изјавува во интервјуто за ’Вечер‘, ниту побарал ниту добил овластување од органите и телата на МАНУ за нејзина презентација“, се наведува во соопштението на Академијата.

Оттаму, „Извршниот одбор со жалење констатира дека академик Ристовски со извршената неовластена презентација на македонската енциклопедија во Киев постапил во спротивност со ставовите на Претседателството и на Собранието на МАНУ“.

Според Извршниот одбор, соопштението завчера не беше доставено до средствата за јавно информирање, бидејќи очекувале дека академик Ристовски, како што ги известил, „самиот ќе ја расчисти противречноста на своите изјави дека извршената презентација на македонската енциклопедија е направена со знаење на претседателот или на органите на МАНУ“. (П.Р.)