Претходен број

Поглед

Страв од летање

Гордана Дувњак

Ќе може ли премиерот Никола Груевски, неговите министри или, пак, претседателот на државата, Ѓорге Иванов, со мирна душа да тргнат на пат во владиниот „лирџет“? Ќе биде ли доволно само да се прекрстат и удобно да се наместат на седиштето и да уживаат во летот?

Тешко. Речиси незамисливо. Особено по драмата што се случи пред два дена на бриселското небо, кога поради дефект на авионскиот транспордер, македонското летало останало „невидливо“ за радарските служби. Ако се има на ум урнатиот владин „кингер“ во кој само пред пет години загинаа тогашниот претседател Борис Трајковски, неговите најблиски соработници, обезбедувањето и членови на екипажот. А и по хеликоптерската несреќа, во која пред 16 месеци загинаа осуммина македонски мировници

За среќа, благодарение на навременото предупредување, но и на присебноста на македонските пилоти, владиното авионче „бело крило“ се врати безбедно оттаму каде што тргна.

Навистина не стаса до Париз, ама успеа да се паркира во еден од бриселските аеродромски хангари. Таму ја чека сервисната екипа, која треба да утврди зошто откажал мерниот инструмент. Делегацијата предводена од премиерот Груевски нема време за чекање и ќе се врати дома со комерцијален лет.

За да не почнат по обичај да се плетат теории на заговор, Владата ќе мора итно да побара да се испита целиот случај. Зашто не е прв пат да се случуваат вакви инциденти, кои колку отпосле некому и да му изгледаат предимензионирано, лесно можеле да завршат фатално.

Истрагата треба да даде многу одговори на прашања што си ги поставува секој лаик, а не само стручњаци за воздухопловство.