Кој е Божидар Спасиќ

Ексјугословенскиот оперативец е централен сведок во повеќе македонски афери од 2003 досега

Соња Крамарска


Кражба на топ-сикрет документи од безбедносен карактер, вмешаност на звучни политички имиња од Балканот во шверц со цигари, планирање и изведување терористички акции, листи на поранешни и сегашни доушници на тајните служби - се' се тоа теми што со задоволство ги разјаснува Божидар Спасиќ во изминатите десетина години.

Речиси нема весник или телевизија од државите што беа некогашни членки на поранешната југословенска федерација, а да не ги користеле неговите изјави. Тој стана централна личност, своевиден сведок и во аферата „досиеја“ што ја тресе Македонија веќе еден месец.

Кој е Божидар Спасиќ? Бивш оперативец на службата за државна безбедност на поранешна Југославија, приватен детектив или провокатор од највисока класа, кој е ставен во служба на политички интереси? Возможно ли е некогашен оперативец од А-листа и од највисок ранг толку слободно да комуницира со медиуми и да им го стави на располагање сето знаење, сите податоци до кои доаѓал како висок службеник во поранешната југословенска полиција и сега како сопственик на детективска агенција?

Во 1999 тој и самиот стана вест во српските медиуми откако беше уапсен затоа што, според тамошната полиција, давал јавни изјави за сопствената вмешаност во организирање убиства во некои западни држави. Го нарекуваа и „Хрват во српската полиција“. На сопствената веб-страница самиот ќе запише во својата биографија дека во Југославија „цело време работел во управата за борба против терористичките усташки и шиптарски банди“. Се пофалил и дека за својата успешна работа повеќе пати бил наградуван „со револвери и други пригодни нешта“. „Акцијата против Јанез Јанша даде одличен резултат и овој злосторник мораше да поднесе оставка“, вели тој на својата интернет-страница.

Спротивно на неговиот ексклузивитет како личност што се наоѓала на чувствителни позиции во безбедносните служби, излезе дека до Спасиќ многу лесно може да се дојде. Македонските новинари што го интервјуираа во врска со досиејата, велат дека е доволен само еден клик на неговата интернет-страница за да дојдете до бројот на неговиот телефон. „Се јавува веднаш и одговара на сите прашање“, зачудено констатираат колегите новинари.

Во 2003, веднаш по паѓањето на владата на Љупчо Георгиевски, Спасиќ се огласи во А1 телевизија со тврдење дека „целиот државен врв на Македонија“, мислејќи на владата на Георгиевски, бил вмешан во шверцот со цигари кон Европа. Во таа пригода, тој ќе се повика на податоци, како што самиот вели, од германската разузнавачка служба за која вели дека „во целост владее со оваа територија“.

На прашањето на новинарот тогаш зошто токму во тој момент ги соопштува своите сознанија за вмешаноста на бившото државно раководство на Македонија во шверц со цигари, тој дава апсурден одговор дека почетокот на годината (интервјуто е направена на 8 јануари 2003) е „вистински момент граѓаните да знаат што ги чека во 2003 година“.

Спасиќ може да се нарече и успешен пишувач на сценарија за холивудски трилери. Македонската полиција тврди дека при претресот на домот на Хисен Муслиу, што го осомничува за наводна изработка и растурање на досиејата против челниците на ДУИ, нашла и сметкопотврди за исплатени над 4 илјади и четиристотини евра на Спасиќ. На тоа Спасиќ експресно реагира велејќи дека тие пари ги доби�� за превод на неговата книга „Ласицата што зборува“, од српски на македонски и на албански јазик.

Со оглед на присутноста на Спасиќ во телевизиите и во весниците од Балканот, нема сомнение дека книгата би можела да има и автобиографски карактер. (С.К.)