Бледнее ли ѕвездата на Груевски?

Според анкетите, популaрноста на премиерот е преполовена, но никако да светне ѕвездата на Црвенковски

Оливера Војновска


Лидерот на десницата Никола Груевски и неговата ВМРО-ДПМНЕ се' уште се највисоко позиционирани на скалата на популарноста (како што покажа последното истражување на ИРИ). Сепак, рејтингот од 27 отсто за ВМРО-ДПМНЕ и 17 проценти за нејзиниот претседател, не им остава простор за задоволство, а уште помалку за спокојство. Бројките покажуваат дека поддршката се' повеќе им се топи, особено на Груевски, кај кого е речиси преполовена во однос на онаа од пред две години (кога достигнуваше до 34 отсто, а ВМРО-ДПМНЕ до 38 проценти) кога нивната слава достигна кулминација. Груевски добро знае дека ѕвездите веќе не му се наклонети и дека во наредниот период неговата популарност ќе продолжи да оди надолу, главно, поради натрупаните економски, финансиски и социјални проблеми.

Но, од друга страна, најголемата опозициска партија многу бавно ги освојува симпатиите на граѓаните. СДСМ сега ужива популарност од 16 проценти, а нејзиниот лидер Бранко Црвенковски - 9 отсто. И додека кај СДСМ може да се забележи одреден прогрес во однос на рејтингот што го имал во јануари 2009 година (девет проценти), кај Црвенковски има само симболично поместување во однос на популарноста пред две години кога имал седум отсто.

Сепак, кога ќе се спореди популарноста на Груевски и на Црвенковски, сега односот е 1 спрема 2, а во 2009 година (кога Црвенковски се' уште беше претседател) Груевски имал петпати повисок рејтинг.

Аналитичарите сметаат дека ваквиот сериозен пад на поддршката на владејачката партија, главно, најмногу е резултат на разочараноста на граѓаните во однос на проекцијата на ветувањата. Притоа се нагласува дека незадоволството од политиката базирана на антиквизација и запоставување на конкретните економски проблеми ќе беше уште поизразено да немаше засилена медиумска кампања. Истовремено се проценува дека допрва следува период во кој власта повртоглаво ќе ги губи симпатиите меѓу народот.

Политичкиот аналитичар Алберт Муслиу не е изненаден од падот на популарноста на власта, бидејќи во јавноста секојдневно има експлозија од незадоволство и разочараност. Луѓето се со празни џебови, изморени од силната национална реторика и бараат конкретни решенија. „Народот имаше огромни очекувања од ВМРО-ДПМНЕ особено на економски план, но се соочи со уште поголема сиромаштија. Груевски се идентификуваше со програмата на ВМРО-ДПМНЕ и сега кога по пет години минати на власт нема напредок, реално е тој најсилно да ги почувствува последиците од незадоволството. Паѓањето на рејтингот дури е успорен. Да не беа владините реклами, тој ќе беше далеку поизразен“, смета Муслиу. Тоа што не може да се забележи некаков напредок кај рејтингот на Црвенковски, според него, е резултат на жестоките лични напади на кои е изложен лидерот на опозицијата. „Црвенковски е главната цел на критиките на ВМРО-ДПМНЕ и на Груевски. Далеку од тоа дека тие се загрижени за консолидирањето на опозицијата, туку, напротив, тоа го прават зошто не сакаат од другата страна да имаат искусен политичар“, уверен е Муслиу. Тој прогнозира дека ВМРО-ДПМНЕ и Груевски допрва ќе ги трпат ударите од незадоволството и ќе добиваат пенали.

Последното испитување на ИРИ првпат покажа дека повеќе од половина од граѓаните, или 53 проценти од испитаниците, се противат Груевски повторно да биде избран за премиер. Пред вонредните избори во 2008 година Груевски не го сакаа само 13 проценти од избирачите, а дури 66 проценти сметаа дека тој треба да биде македонски премиер.