Што прават денеска

Ребека

пејачка

Син ми од неодамна тргна во градинка, па денот ни почнува со подготовка за социјализација со децата. Во 11 ч. сум на прес-конференција за проектот на новата организација „Вомен анлимитед“. По пресот, продолжувам со средби и состаноци за подготовка на емисијата „Дајте ни крилја“, што се емитува на АБ канал. Во план имам и посета на фризер, па се надевам дека се' ќе постигнам.

Бајруш Мјаку

актер

Денес заминувам за Белград, каде што ќе работам на театарскиот проект „Патриотик хипермаркет“, во режија на Дино Мустафиќ, а според текст на Миња и Јетон. Ќе работиме до 25 јули, па правиме пауза до есен за да продолжиме со подготовките до премиерата на 3 октомври на БИТЕФ. Продуценти на проектот се „Култура нова“ од Нови Сад и „Мултимедија“ од Приштина.

Лада Петровска

виолинистка

Претпладнето ми е ангажирано со проба во Македонската филхармонија, каде што ја подготвуваме програмата за отворањето на „Охридско лето“. Неколку скапоцени часа во денот ги минувам во гушкање на моите деца. Попладне заминувам за Штип, каде што со квартетот „Марија“ ќе одржиме концерт во рамките на „Штипско културно лето“.