Македонија е Гордиев јазол на ЕУ

Билд и Раинфелд би можеле да се запишат во историјата доколку со еден Александров замав го пресечат јазолот

Гетеборг - Идната седмица агендата на ЕУ се шири на сите страни и кулминира со самит на шефовите на држави или на влади што, всушност, би можел да се претвори во вистински антиклимакс, пишува денеска шведскиот дневен весник „Свенска дагбладет“.

Таков развој не се очекуваше. Шведскиот премиер Фредрик Раинфелд во Копенхаген требаше успешно да ги почне финалните преговори, крунисувајќи го шведскиот претседавачки мандат преку репрезентирање на глобалното лидерство на ЕУ во климатската политика.

Но, политиката во последните неколку месеци не оставаше многу простор за оптимизам и предизвика сериозни пукнатини околу големите очекувања од климатскиот самит.

Самитот на ЕУ, место посакуваното сјајно крунисување, сега го очекува еднолична и придушена атмосфера, со понекогаш тешко сфатливите проблеми што со години ја оптоваруваат агендата.

Еден од тие проблеми, кои шведското претседателство би требало да се обиде да го реши, се однесува на Македонија.

Денеска Македонија ќе се најде на агендата на Советот на ЕУ преку тешко сфатливи формулации. Советот треба да заземе став околу препораките на Европската комисија за отпочнување преговори за членство со Македонија. Потоа прашањето би требало да биде присутно и на самитот на ЕУ идната седмица.

Проблемот, всушност, е речиси 20-годишниот спор за името што се враќа назад до историските претстави за Македонија и кралството на Александар Велики. За нив се врзуваат националистичките идентитети и симболи што во голема мера се актуелизираат од страна на политичките лидери во Атина и во Скопје.

Доколку би им се верувало на најекстравагантните пропаганди, Балканот би можел да се дестабилизира од ова прашање. Од друга страна, пак, повеќемина студени и резервирани надворешни набљудувачи сметаат дека и двете страни имаат слаби основи за своите претензии за монополизирање на наследството по Александар Велики.

Истовремено, сега постои историска шанса за наоѓање решение за овој Гордиев јазол. Односите меѓу Атина и Скопје, по се' изгледа, се нормализирани и новиот грчки премиер Папандреу би сакал да ја измени сликата за својата земја како постојан негатор и предизвикувач на конфликти во ЕУ и во НАТО. Повеќе од кога и да било досега, Папандреу треба да ги освои симпатиите во рамките на ЕУ за да се справи со галопирачката финансиска криза во Грција. Како членка во еврозоната, Грција практично ризикува да се најде под принудн�� управа за да се спречи банкрот на државата. Паралелно со тоа е важно да се спомне фактот дека Грција е и најголем примател на регионална поддршка од касата на ЕУ.

Јоргос Папандреу, кој има стабилно мнозинство до 2014 година, би требало да се заложи за отворен став. Тој едвај би имал простор да стави вето доколку шведскиот премиер Раинфелд и министерот за надворешни работи Карл Билд покажат креативна способност во однос на прашањето за името. Билд и Раинфелд, пишува „Свенска дагбладет“, неочекувано би можеле да се запишат во историјата доколку со еден Александров замав го пресечат јазолот. (МИА)