Груевски го чека датумот во Брисел

Премиерот ќе се обиде да издејствува попозитивна одлука

Од нашиот дописник
Слободанка Јовановска

Брисел - Премиерот Никола Груевски денес попладне треба да допатува во Брисел за да учествува на форумот на балканските земји во вторник, но можно е неговиот престој да се пролонгира до Самитот на ЕУ закажан за четврток. Иако од македонски извори никој не ја потврдува веста, сепак, Груевски, по се' изгледа, ќе се обиде да издејствува попозитивна одлука за Македонија, а неофицијално не се исклучува уште една средба со грчкиот лидер Јоргос Папандреу по примерот на онаа што се случи минатиот Самит на Европската унија. Според грчки извори, Папандреу нема да учествува на министерскиот состанок на ЕУ денес и утре, но ќе биде на Самитот на социјалистите и на ЕУ во четврток и во петок, па останувањето на Груевски во Брисел не би имало друга смисла ако не се сретне повторно со грчкиот лидер. Имено, Самитот на народните партии на кој, по правило, учествува и нашиот премиер овој пат ќе се одржи во Бон место во Брисел, па отворено прашање е како ќе се одвиваат настаните наредната седмица, која треба да биде клучна за евроинтеграцијата на Македонија.

Ден пред министерскиот состанок на Еу практично ништо не е извесно околу препораката за преговори, а дилемите се движат од тоа дали воопшто ќе има заклучок за Македонија или не, дали ќе се спомне името како услов или не, дали ќе има рок за решавање на спорот или не, дали ќе има нешто ново или само ќе се повтори ставот на ЕК или на ЕУ министрите од јуни минатата година. Во грчките кругови владее уверување дека за Македонија најверојатно заклучок нема ниту да има на Самитот, а повод, меѓу другото, е и тоа што досега расправата не беше отворена околу нашата препорака ниту, пак, фигурира јавно некаква драфт реченица. Логиката е дека без заклучок нема да има ниту вето, ниту Букурешт и нема за што да се обесхрабрува Македонија, но прашање колку таквата политика има смисла кога првенствената цел поради која ЕК излезе со препорака за преговори беше не евроинтеграцијата, туку создавањето притисок да се реши спорот околу името на државата.

Она што е извесно е дека Брисел прави се' да ја држи Македонија на линија, односно да покаже дека прави се' што може околу препораката и да ја убеди нашата Влада да биде кооперативна и конструктивна, каков и да е сега исходот за нас во четврток.

Дипломатски извори во Брисел оценуваат дека моментно траат убедувањата на Атина да направи компромис околу одлуката за препораката на ЕК, но скептицизмот е голем порад�� впечатокот дека и оваа влада е заробена во балканскиот начин на водење на политиката. Инаку, Македонија треба да биде на дневен ред на министрите денес попладне, а на балканскиот форум , организиран од „Пријатели на Европа“, покрај Груевски, ќе учествуваат и лидерите на Црна Гора, Словенија и на БиХ, како и еврокомесарот Оли Рен. (С.Ј.)