Претходен број

ДУИ со Бадентерово мнозинство „пука“ на европската агенда

Партијата на Ахмети бара законот за Собрание да се носи со Бадентерово мнозинство

Оливера Војновска

Само два дена по хармонијата што во Клубот на пратениците ја демонстрираа лидерите на најголемите партии, освен ДПА, се отвора нова голема пукнатина на патот кон Европската унија. Овој пат јазот не го копа опозицијата, туку владината ДУИ со нејзиното барање законот за Собрание да се носи со Бадентерово мнозинство. Шансата што ја виде премиерот и лидер на десницата, Никола Груевски, по посетата на еврокомесарот Оли Рен, се чини не ја гледа и неговиот коалиционен партнер Али Ахмети. Уште помалку, пак, го слушна неговиот повик дека „шансата треба да ја искористиме како држава, независно кој во која партија е и во каква позиција се наоѓа“.

Барањето на партијата на Ахмети доаѓа откако Нова демократија на Имер Селмани е упорна во ставот дека „албанскиот јазик треба да се употребува како втор службен јазик на сите нивоа и на локално и на централно“. А, тоа подразбира и раководење на собраниските седници на албански јазик, вклучувајќи дека комплетната документација и материјалите во парламентот да бидат двојазични.

„ДУИ ќе го поддржи законот со забелешка дека тој треба да се гласа со Бадентеровото правило, затоа што ја уредува употребата на албанскиот јазик во Собранието“, одговори координаторот на пратеничката група на ДУИ, Тахир Хани, на прашањето дали ДУИ ќе гласа за законот за Собрание доколку не бидат прифатени амандманите на Нова демократија. Инаку, ДУИ ги поддржува барањата на Нова демократија за допрецизирање на употребата на албанскиот јазик. Хани вчера на новинарите им објаснуваше дека „на лидерската средба на која беа претседателот Али Ахмети и Џеват Адеми, не беа поставени многу прашања, така што тоа е договор меѓу координаторите на пратеничките групи околу законот за Собранието“.

Координатор на пратеничката група на Нова демократија, Флора Кадриу, изјави дека ќе го поддржат законот за Собрание, само доколку се прифатат нивните амандмани за допрецизирање на употребата на албанскиот јазик.

Наспроти ваквите барања на партиите на Албанците од власта и од опози��ијата, владејачката ВМРО-ДПМНЕ е оптимист дека законот за парламент ќе биде усвоен на 17 август.

Спикерот Трајко Велјаноски по вчерашната координација на пратеничките групи соопшти дека пратениците ќе го скратат одморот за една седмица и ќе паузираат од 2 до 17 август, по што ќе го донесат законот за парламент. За денеска тој најави дека Собранието ќе го усвои законот за финансирање на политичките партии. Велјаноски рече дека е договорено законот за државни службеници, кој Владата го повлече на доработка, во собраниска процедура да влезе на средината на август. Дотогаш политичките партии ќе може да ги достават евентуалните забелешки, кои би биле вградени во законот, за да може до почетокот на септември да биде усвоен од Собранието. Во врска со барањето на СДСМ за измена на Деловникот, спикерот соопшти: „Договорено е да се задолжи Комисијата за мандатно-имунитетни прашања во рок од четири месеци да ги изготви измените на Деловникот, во согласност со препораките на Венецијанската комисија“, изјави Велјаноски.

На прашањето дали инсистирањето на Нова демократија за поширока употреба на албанскиот јазик може да го загрози носењето на законот за парламент, Велјаноски кусо одговори: „Нема потреба од други условувања, тоа прашање е регулирано со закон“.

На истото прашање, премиерот Груевски во петокот по лидерската средба одговори дека „употребата на албанскиот јазик и доимплементацијата на Законот за употреба на јазиците се дел од предизвиците што произлегуваат од Охридскиот договор и Владата му е посветена на тоа прашање“.

Шефицата на пратеничката група на ВМРО-ДПМНЕ, Силвана Бонева, изјави дека „ќе се вложат напори да се усогласат ставовите на сите политички партии и ќе се почитува Законот за употреба на јазиците, што требаше да ги сублимира сите прашања од тој домен“.

Координаторот на пратеничката група на СДСМ, Цветанка Иванова, го повтори ставот дека партијата ќе даде „конструктивен придонес за да може Македонија, до 15 септември, а ако е можно и порано, да ги исполни обврските кои ги има за добивање позитивен извештај од ЕК“.

Пратеничката од ЛДП, Роза Топузова-Каревска, протестираше поради тоа што се суспендира Собранието, а лидерските средби се издигнуваат на ниво на институција. „Кај нас, наместо парламентарна, има лидерска демократија“, констатира таа, а потоа иронично додаде „ексклузивната заслуга за добивањето препорака за датум за преговори ќе ја има Собранието“.

Инаку, според договореното на лидерската средба, најдоцна до 15 септември Собранието треба ги донесе законите за парламент, за финансирање на политичките партии и за државни службеници.