Претходен број

Македонија нема да биде заборавена на самитот на НАТО

Се менува политиката на САД спрема Македонија, тие не се веќе лидери во промовирањето на членството на нашата држава, поголема загриженост покажуваат други земји во Алијансата

Од самитот ќе биде упатено охрабрување да не се обесхрабруваме

Од нашиот дописник
Слободанка Јовановска

Брисел - Македонија ќе ја нема на самитот на НАТО неделава, но нема да биде сосема заборавена, па и повеќе од тоа, ќе добие охрабрување да не се обесхрабрува, бидејќи земјите-членки не сакаат да ја видат како оди назад место кон членство во Алијансата. Во ваков тон ќе биде заклучокот кој моментно се договара во НАТО и кој ќе биде дел од завршното коминике што ќе биде усвоено на самитот во Стразбур, планиран за в петок и сабота.

„Сигурно е дека Македонија ќе биде спомената во завршниот документ, иако се' уште не е прецизирано како. Имаме исход од Букурешкиот самит дека земјата ги исполни критериумите за членство и сега од огромно значење е да не видиме како таа оди назад со реформите. Тоа ќе биде изразено во коминикето“, изјави висок дипломат од Алијансата на брифингот со новинари.

Според овој извор, заклучокот за Македонија треба да биде охрабрувачки и да потврди дека позицијата во Алијансата во однос на Македонија нема да се смени, во смисла да се преиспита дали треба да остане полупоканата или не. „Македонија нема да биде големо прашање на самитот. Всушност, проширувањето нема да биде тема на овој собир во Стразбур. Но, ние мора да ја реафирмираме нашата позиција и да упатиме охрабрување“, изјави високиот дипломат на Алијансата. Според друг дипломат, на Македонија главно ќе и' се упатат топли зборови, со генерална порака на линијата на она што беше договорено во Букурешт.

Неофицијално во НАТО се' уште се расправа каков вординг да биде вклучен за Македонија за да не се почувствува заборавено, но не и да се премине тенката линија преку која ќе се остави впечаток дека има простор за преиспитување на веќе договорената условена покана. Иако деведесет отсто од агендата на самитот ќе биде новата стратегија на НАТО, Авганистан, односите со Русија и сојузништвото на САД и Европа, ќе се прати и генерална порака за Балканот дека треба да биде вклучен во евроатлантските интеграции за да биде и тој дел од стабилна и безбедна Европа.

Извори од Алијансата вчера ја правдаа одлуката Македонија да не биде поканета воопшто на самитот со забелешката дека ќе беше чудно да беше обратно, бидејќи на неа ќе седат само земји-членки, а таа не е. Хендикеп или можеби среќа е што самитот се одржува еден ден пред изборите во Македонија, па во завршниот документ ќе нема референца за нив, бидејќи земјите-членки не сакаат да се истрчаат со оцени кои потоа може да бидат демантирани во земјата. Македонија, сепак, ќе има свое место на состанокот што денес ќе се одржи во Хаг околу мисијата на НАТО во Авганистан и на кој, според најави од Брисел, најверојатно проширувањето ќе биде отворено како тема.

Иако на Македонија не и' е баш местото во таа расправа, бидејќи нејзиниот статус е далеку подобар од тој на Грузија и на Украина, кои се следни на линија, а чиј прогрес од Букурешт сега се игнорира во Алијансата, од сите, па и од новата администрација во САД. Во НАТО неофицијално се слуша дека се менува и политиката на САД спрема Македонија, во смисла дека тие не се веќе лидери во промовирањето на членството на нашата држава, па сега за нашето статус кво поголема загриженост покажуваат други земји во Алијансата.

Според американски извори, САД на самитот во Стразбур ќе дојдат не само со нова политика туку и со нов политички стил, односно нема да им кажуваат на другите членки што треба да прават, туку ќе ги остават самите да предлагаат, иако многумина и натаму очекуваат од нив да го прават спротивното, што во Вашингтон сега го сметаат како своја лоша навика.

„Ние сме заедница на нација. Надминувањето на оваа лоша навика, да им кажуваме на другите што да прават, не е лесно. Се' уште има луѓе кои очекуваат од нас да го правиме тоа“, тврдеше вчера американски дипломат. Неофицијално жртва на промените ќе биде и американскиот амбасадор Курт Волкер, бидејќи САД сакаат да ги рестартираат целосно односите и политиката спрема НАТО и жешките прашања околу него.
На самитот вест нема да бидат ни Албанија и Хрватска, бидејќи нивното членство стана реалност, а со тоа и техника. Според извори од НАТО, вчера попладнето во Вашингтон пристигнала ратификацијата на поканата за Хрватска од страна на Словенија, така што нивниот прием не е веќе тема за возбуда. На тема билатералните спорови, словенечко-хрватскиот и македонско-грчкиот, дипломатите порачаа дека е најважно да се надминат проблемите од минатото, односно да се отворат тие прашања, да се решат и надминат за овие земји да станат дел од стабилна и безбедна Европа, а не само да се здобијат со членство. Пораката е дека проблемите треба да се затвораат, а не да се игнорираат, биле пречка за членство или не.