Насловна

Вајнхаус

„Авалон“: Не е наша вина што Ејми беше очајна

Организаторите на концертот во Белград им се извинија на сите присутни. Tие објаснија дека воопшто не можеле да влијаат врз пејачката зашто им бил забранет секаков контакт

Катерина Шекеровска

l по откажаните концерти во Истанбул и во Атина, неизвесен е останатиот дел од европската турнеја

l парите за влезници нема да се враќаат

l концертот во Белград – најлош во историјата

Контроверзната британска пејачка Ејми Вајнхаус ги откажа своите настапи во Истанбул и во Атина, дел од европската турнеја, како последица на скандалот што го предизвика во саботата на Калемегдан во Белград, кога пред тамошната публика се појави во алкохолизирана (дрогирана) состојба.

Концертот на Ејми е на добар пат да биде прогласен за најлош концерт во музичката историја, а уште еден поразителен факт е што зад неговата организација стои македонската продукциска куќа „Авалон“, на чија адреса одат критиките за фијаското на Калемегдан.

„Не е наша вина што Ејми беше очајна, ниту, пак, наша заслуга што Моби беше брилијантен“, се оправдуваат од „Авалон“. Но, што навистина се случи и како триумфалното враќање на Ејми одеднаш се претвори во најлош кошмар? „Ние како организатори прв пат ја видовме кога се качи на бината и последен пат кога слезе од истата бина! Ни беше забранет секаков контакт и тоа јасно го нагласивме уште на прес-конференцијата во Белград пред 10 дена, дека тоа е ставка што стои во договорот и која не е невообичаена за секој договор со светските артисти“, објаснуваат од „Авалон“. Оттаму потенцираат дека „на наша и ваша голема жалост“ Ејми се појавила на време на сцената и ги „одработила“ своите минимални, со договор предвидени 60 минути. „Во ниеден договор со светските изведувачи не се наведува како треба да изгледа тоа! Како организатори направивме се' да биде од прва класа за овој ивент да изгледа светски и воопшто не треба да се извинуваме за нешто на што не можевме воопшто да влијаеме, но, сепак, најискрено им се извинуваме на сите присутни“.

Во меѓувреме стаса и соопштението од менаџментот на Ејми, во кое информираат дека по скандалот во Белград пејачката се враќа дома и ги откажува настапите во Истанбул и во Атина. „Таа би сакала да им се извини на своите фанови што очекуваат да ја видат во шоуата, но чувствува дека ова е вистинската работа што треба да ја направи“, се вели во соопштението, во кое не се прецизира што ќе се случува со другите закажани концерти од европската турнеја и дали воопшто ќе се појави на 8 јули во Шпанија.

Од она што со сигурност го знаеме е дека и покрај критиките и некои барања за враќање на парите за влезници, нема основа за нивно рефундирање. Хонорарот на Ејми, кој е деловна тајна, е исплатен уште пред неколку месеци и оттаму не постои никаква можност за обесштетување на присутните, особено зашто таа си го исполнила договорот и си ги „одработила“ своите 60 минути на сцената.

Веста за скандалот на Ејми во Белград е топ-тема во балканските и во странските медиуми. Вистинска трагедија e што ги идеализираме поп-ѕвездите како што е таа, констатира „Дејли мејл“. Ејми не успеа да го одржи ни ветувањето за новиот албум што никако да се појави во продавниците. Нејзиниот несигурен настап пред четири месеци во Дубаи беше прекинат, а токму белградското шоу требаше да биде гламурозно враќање на проблематичната ѕвезда, која штотуку дојде од рехабилитација.

Но, очигледно не требало ни да излегува оттаму. Барем немаше да ја малтретира 20-илјадната публика и да ги поздравува Атина и ��ујорк среде Белград. Нејзиниот концерт, дефинитивно, ќе се памети како еден од најлошите, за што потсетување во секое време може да добиете на интернет каде што има снимки од едночасовното мрморење, паѓање, станување, тресење глупости на Калемегдан...

Се' погласно се поставува прашањето до кога може Ејми да издржи вака пред да се убие? И како луѓето околу неа можеа да и' дозволат јавно да се избламира, да крахира? Сама си ја крои својата мизерија, но одговорност, сепак, има и во нејзиниот менаџерски тим, кој ако не може да ја стопира во сопственото злоупотребување, може да и' забрани да го прави тоа на сцената. Барем светот да не гледа. Да не ни се случува трагедија пред очи.

Што е со сите оние тинејџерки што и' се восхитуваат и се обидуваат да ја копираат? И кои се' уште мислат дека нејзиното однесување е кул?

Коментар

Бев таму, беше тажно да се гледа. Срам да му е на нејзиниот менаџмент што и' дозволи да излезе на сцена во таква состојба. Таа не е за обвинување - неа и' е потребна помош

посетителка

Тажно. Тажно ми е сето тоа. Тажен сум што таа воопшто се наоѓа во таква состојба и тажно ми е поради публиката што дојде да го гледа тоа. Тоа беше грозно реално шоу

СергеJ ТрифуновиЌ