Претходен број

Мислења

Заложници на рејтинзите

Филип Петровски

Дали има основа да сметаме дека сите некогашни вмровски првенци треба да бидат избербатени, за да остане само еден лик што сите ќе го обожаваат

Да бидам искрен, веќе неколку седмици се подготвувам да пишувам за две теми, кои сметам дека и тоа како се релевантни за Македонија. Едната се однесува на шведското претседавање со ЕУ, а другата е посетата на Обама на Русија, односно руско-американскиот самит, што имаше значајни моменти и кој може во иднина да ги смени во многу работите во светската геополитика. Кај нас, како по обичај, овие настани поминаа без да им се даде некоја поголема важност. Ние сме закопани во нашите ровови, во нашите „плитки“ умови и не ни е многу битна поголема слика, туку најбитно ни е на соседот очите да му ги извадиме. А потоа кога ќе поминат шансите, кога нема да ги сознаеме вистинските моменти, тогаш цел свет ни е виновен и секако дека сите се против нас и во заговор. Дека сме им толку многу значајни на сите светски сили и велесили. Од уста не не' вадат...

Како и да е, се чини дека еднаш седмично не е доволно да се испишат стотина редови и во нив да се промисли на релевантен начин се' што се случува околу нас. За жал, гореспомнатите настани ми побегнаа поради други, исто така, значајни теми. Тие и оваа седмица ќе им го отстапат местото на некои домашни случки, кои сами од себе се наметнаа да бидат коментирани. Имено, некако чудно и „по малку“ синхронизирано се случија некои напади во медиумите. Прво се објави анкетата на меѓународниот републикански институт, со која, меѓу другото, се истражува и рејтингот на партиите и на политичарите. Според досегашните истражувања, овој институт покажал голема прецизност во определувањето на рејтингот. Често погодуваат точно во процент, што секако им дава право да се гордеат дека ги прави релевантни и секако отпорни на секаков вид притисоци, кои кај нас се честа појава. Последниве години се чини дека потребата од висок рејтинг станува неопходна работа во македонската политика и поради тоа политичарите се подготвени да сторат се'. Меѓу другото, да потрошат немерено државни, односно народни пари на бесмислени кампањи, што имаат само цел да го исперат мозокот, како и да вршат притисок врз мерачите на рејтингот, за резултатите да бидат во нивна корист. Не е непознато во режимите кои се склони кон перење мозок посегнувањето и по други методи за да се создава слика на „совршеност“ и да се велича лидерот.

Анкетата на ИРИ покажа дека рејтингот на премиерот е драматично опаднат меѓу двете мерења. Ова стана голем проблем на државно ниво затоа што ваков тренд прв пат по подолго време се забележува. Тој тренд се заканува да стане и поизразен во наредниот период затоа што допрва економските проблеми ќе добијат на сила, како и проблемот со името за што, според надворешните притисоци, се бара решение во многу скоро време. Иако за тие проблеми се говори кај нас како за апсолвирани прашања. Но, забивањето на главата в песок не ги решава проблемите. Лично очекувам дека најголемите проблеми ќе дојдат во септември. Тогаш традиционално се зголемува потребата за трошење на ресурси за семејствата, а сето тоа по скапите летни денови. Затоа ова се елементи кои ќе се надградуваат во незадоволството од власта, која владее само врз основа на бесконечно давање ветувања, кои не ги исполнува. Целото незадоволство и тоа како ќе се покаже во наредните мерења на рејтинг. Проблем!



Сите што не се „заспани“ или, пак, „успиени“ забележаа дека веднаш, да не речам во истиот момент, се почна со одговор на паднатиот рејтинг. Се пронајде виновникот. Тоа е Љубе Бошкоски. Лоциран како проблем, затоа што им нуди алтернатива на сите разочарани членови на ДПМНЕ, тој беше изложен на брутално распнување во сите медиуми кои работат под диктат на Владата. Не се избираа средства тој да се дискредитира затоа што се осмелил да има поинакво мислење, затоа што сака да се занимава со политика, која деновиве е резервирана само за безлични послушници. Сетете се само на армијата пратеници за кои ништо не знаете, освен дека имаат теледиригирани инструкции како да се држи во покорност целиот систем. Има и други, тазе дојдени од други партии, претежно пребегнати од СДСМ. За да бидат на власт. Тие најсилно плукаат и се најпогодни за да се користат како јаничари. Не е само Боцевски таков. Ги има безброј. Тоа вмровците го гледаат. Истите оние кои на терен ја донесоа победата. И принудени се да молчат. Се' до моментот кога на сцена се појави ортодоксниот брат Љубе. Да ве потсетам дека Груевски и Влатко Ѓорчев први трчаа со него да се поздрават на аеродром. Ние што пристигнувањето скромно го следевме преку ТВ-екраните добивме впечаток дека Влатко повеќе го сака од своето семејство. Тој лик, сега се гледа, се залепил таму, за потребите на пропагандата. Да се создава слика дека патриотот Љубе е со нив. Не знам колку пати пред враќањето на Љубе бевме известувани дека го посетиле министрите на Груевски (Миле, Ставрески и др.) во Хаг. Па, се надевам, не сте со толку кратко паметење да не се сеќавате како беше пред 15 месеци. Сите даваа изјави, пишуваа реферати како било кога го посетиле легендарниот Љубе во Хаг. И одеднаш се' се промени. Кога разбраа дека не ќе биде лесно да се контролира, дека има свое мислење (па макар и да е погрешно), веднаш беше отпишан. Плус веќе не можеше пред народот да се користи како ЕПП секој ден, се врати од Хаг.

Но, една страдна македонска душа се' уште е таму. Јохан е се' уште таму. И затоа е и повеќе од соодветен се' уште да се користи во пропагандни цели. Тоа се прави систематски и вулгарно, не поради Јохан и неговата жртва за Македонија, туку поради потребата да се создава висок рејтинг. Па, пропагандисти, дали сметате дека ние обичните луѓе тоа не можеме да го видиме? Еве како пример ќе го земам Дершовиц (адвокат на Јохан), кој се вмеша во случајот. Но, тоа е и повеќе од нормално. Тој е ангажиран, односно платен од Владата. Според тоа, се знае каде лежи неговата лојалност. Патем, може ли некој да одговори колку Дершовиц чини и на кој начин му се плаќа? Или и тоа, како и стотици други случаи на трошење на државни пари ќе останат во доменот на државна тајна.



Сега едно трик прашање. Го поврзувате ли нападот врз Љупчо од страна на Пауновски во овој ист контекст? Има ли основа да сметаме дека сите некогашни вмровски првенци треба да бидат избербатени, за да остане само еден лик што сите ќе го обожаваат.

Ех, залудно се троши корпусот на македонската енергија. Понекогаш сето тоа ми изгледа како добро смислена стратегија за да не' нема.

(Авторот е докторант по меѓународна политика)

http://filippetrovski.blog.com.mk