И гроздоберска фаланга!

Наум Николовски, Кавадарци

Туристичко-стопанската манифестација „Тиквешки гроздобер“ е една од најстарите манифестации од ваков карактер во државата, чие одржување почна во педесетите години на минатиот век.

По извесно прекинување (во осумдесетите години) со залагање на челниците на локалната самоуправа, во претходниот и во овој мандат, манифестацијата се обнови. И така треба да биде.

Основната идеја беше, разбирливо и сега, како до содржини, кои ќе го промовираат винскиот туризам во Тиквешко, идеја што не е нова и по чија содржина се трага. Токму во „Тиквешкиот гроздобер“ се гледаат основите и моделитетите што ова подрачје ќе го направат стопански интересно и во деновите пред и по манифестацијата. Тиквешкиот гроздобер во секој случај го афирмира регионот како централно подрачје за производство на грозје и на вино.

Токму затоа изненади отсуството на економските пунктови, досегашниот Саем на вино и производи, лани промовираниот „Вински пат“, експонираноста на ВВ „Тиквеш“, локалните приватни винарски визби...

Изгледа не е изненадување отсуството на симболите на лозата и на виното на централната „Карневалска поворка“. Во годинашново скратено стотинаметарско издание, се вклучи и турнејата на т.н. „Македонска фаланга“ (по Крушево, Берово...). Педесетина деца, во картонски кореографски кич, што покажа дека дури и гроздоберот не може да мине без детската „фаланга“ демонстрација на своевиден популизам и аматеризам.

Со отворени дилеми дали „фалангата“ пред три-четири илјади години садела лозје, произведувала вино во Тиквешко или само пиела? Како перјаница на тогашната внатрешно-револуционерна организација? Или денешниве скокнале од новата национална арена „Филип Втори“, па преку автопатот „Александар Македонски“, навратија во Кавадарци?

Сериозно, манифестацијата треба да се заштити од дневно-политички популизам. За да ја задржи својата смисла.