Претходен број

Мрачни прогнози за Македонија од известувачот на ЕУ

Статусот кандидат во ЕУ не носи и напредок: Ерик Мејер

Судењето во Хаг драматично ќе го одложи членството на нашата земја во ЕУ, прогнозира Ерик Мејер

Од нашиот дописник
Слободанка Јовановска

Брисел - Известувачот на ЕУ за Македонија, Ерик Мејер, се пожали дека не може да влијае на содржината на сопствениот извештај што ќе се гласа идниот месец, бидејќи желбата во Европскиот парламент и во Советот да се избегне грчко вето е толку силна што не била прифатена ниту една од неговите критики на наша сметка.

„Желбата да се избегне грчкото вето, без оглед на цената, веројатно е вистинската причина за инерцијата што ја покажуваат ЕП и Советот“, изјави Мејер, тврдејќи дека резултат на тоа е „великодушноста“ во процената на ситуацијата во земјата, толкава што ниту една од неговите забелешки не била прифатена од европарламентарците.

Тоа е спротивно од впечатокот во нашата држава дека во ЕУ, всушност, се бараат причини како да се оправда застојот на Македонија за да не се види дека причина за тоа е името. „Веројатно оваа мрачна перспектива ги убеди членовите на Комитетот за надворешна политика да бидат великодушни во оцената, па дел од моите критики, базирани на моите сознанија од прва рака во Македонија, за изненадување, не наидоа на поддршка од мнозинството парламентарци“, се пожали Мејер.

Европарламентарците немале слух за неговата забелешка дека властите во Македонија за време на последните избори не направиле ништо однапред да ги спречат инцидентите, како и за оцената дека се неприфатливи апсењата за корупција пред телевизија на битни членови на опозицијата без да се презентираат докази за вината. Исто така, европарламентарците не застанале зад неговата критика за усвојувањето на законите по ургентна процедура, нешта што ги имаше во првата верзија на неговиот извештај, но се избришаа.

Таа великодушност, според Мејер, сепак, не може да ја забрза евроинтеграцијата на земјата, која како да е заборавена последните години, бидејќи доби кандидатски статус во иста година со Хрватска и додека Хрватска е пред прием, Македонија не почна ни преговори. Негативната порака до другите земји од Западен Балкан, смета Мејер, е дека статусот земја-кандидат повеќе не значи ништо ако не носи напредок, а во македонскиот случај причина за тоа е спорот околу името на државата, околу кој Мејер се' повеќе се приклонува кон грчката позиција.

Неговата реакција, по се' изгледа, мотивирана е токму од оваа причина, бидејќи тврди дека е доволно Македонија да прифати додавка на името на државата, како што се северна или горна, и Грција би се согласила со тоа. Барањето до Атина да не користи вето за евроинтеграцијата на Македонија, што беше вметнато од други европарламентарци, тој го оценува како „морален повик до Грција“, што не и' го скратува правото да стави вето на земјите што бараат членство.

За да биде поуверлив дека Македонија е заборавена по своја вина, бидејќи не го решава проблемот што може да се реши, Мејер ја посочува одлуката на македонската Влада да поведе постапка во Судот во Хаг, која не води кон ништо друго туку кон застој на преговорите.

„По ова евроинтеграцијата на земјата ќе се соочи со развлечена стагнација, а дали исходот ќе биде одлагање од 10, 20 или 30 години е тешко да се каже, но постои шанса сите други држави од бивша Југославија, кои сега не се ни кандидати, да станат членки пред Македонија. Се плашам дека друг парламентарец ќе пишува извештаи за земјата многу по моето пензионирање“, смета Мејер.

Мејер, инаку, не е дел од влијателните големи парламентарни групи во Европскиот парламент, па тоа го објаснува и фактот дека не успева да ги наметне своите ставови, бидејќи членовите на најголемата групација застанаа на друга позиција – дека состојбата со недавањето датум за преговори е неодржлива и дека ветото не е пожелна опција.

Неговата реакција се совпадна со обидите на заменик-шефот на грчката дипломатијата, Јанис Валинакис, да влијае на европарламентарците, три недели пред гласањето во Стразбур, да се приклонат на ставот дека Македонија не заслужува чекор напред во ЕУ, не поради името, туку затоа што и натаму е проблематична држава.