Насловна

„Агроплод“ е жртва на лоша инвестиција

Ѓорѓи Китиновски, претседател на одбор на директори на „Агроплод“

Почитуван премиере,

Со целосна и недвосмислена поддршка на Вашата борба против криминалот, корупцијата и пајажините, сакаме да укажеме на еден случај што најверојатно ќе Ве стави во искушение дали таквата борба има алтернатива.

Имено „Агроплод“ АД Ресен, фирмата што беше лидер во прехранбената индустрија во бившата држава, сега е жртва на една долга и мачна приватизација како оние од 90-тите години кога нивото на развиена свест за демократија беше далеку од сегашното.

Денес, по 20 години самостојна и независна Република Македонија, со развиен правен систем и донесени и имплементирани сите можни закони, ни се случува една игра на манипулација со државата, капиталот и луѓето, игра во која главната улога ја игра „Свислион“ ДОО Скопје.

Имено, станува збор за една неприродна и уникатна ситуација во која акцинерот „Свислион“ ДОО Скопје, кој поседува околу 30% од акциите на овој ресенски комбинат, го прелеал целокупниот капитал на фирмата во фирмите-ќерки и владее со 100% од капиталот, додека другите акционери, меѓу кои и Република Македонија, со околу 30% немаат ништо.

Не треба човек да биде којзнае колку вешт познавач на закони за да знае дека 30 не е еднакво на 100 и дека некој што има 30% од нешто не може да го има целото, а оние што имаат 70% да немаат ништо. И тоа трае цели пет години.

Парадоксот да биде поголем, оној што има 30% денес ја тужи Република Македонија на Меѓународен суд, сакајќи да докаже дека бил жртва и дека е оштетен за 20-ина милиони евра.

Толку за манипулацијата со капиталот и државата!

Манипулацијата со вработените допрва следува и тоа е целта на ова писмо навремено да укажеме на обидите за манипулација со луѓето - околу 500 вработени, бројка, која за еден мал Ресен, е многу голема.

Почитуван премиере,

Начинот на кој ја водите Владата и начинот на кој ја водите борбата против криминалот и корупцијата се за поздравување, но случајот !Агроплод“ ќе Ве стави пред искушение дали да ја продолжите таа борба или да подлегнете на манипулативните методи на „инвеститорот“ „Свислион“.

Зошто го мислиме тоа? На крајот на август оваа година завршуваат договорите за деловно-техничка соработка меѓу „Агроплод“ и фирмите-ќерки „Свислион-Агроплод“ ДОО Ресен и „Преспатурист“ ДОО Ресен, кои беа потпишани пред пет години и со кои „Агроплод“ на ќерките им го отстапи половината од својот имот. Другата половина беше внесена како влог при формирањето на ќеркинските фирми.

Ова значи дека по автоматизам, половина од фабриката се враќа на „Агроплод“, а половина останува на „Свислион-Агроплод“ или значи дека ниту едната ниту другата фирма може да организира производство, т.е. вработените остануваат без работа. Во една таква ситуација „Свислион“ би ги извадил вработените на улица и би се предизвикал притисок врз локалната и централната власт да направат отстапки во врска со случајот, со цел вработените да не останат на улица.

Токму во таа ситуација е искушението премиере пред кое ќе се најдете: дали да ја запрете борбата за правда и почитување на законите и акционерските права или да ја аминувате манипулативната организациска шема со 30% од акциите некој го собира целиот профит од „Агроплод“.

Битката на Македонија за лов на инвеститори подразбира барање пријателски инвеститори кои имаат цел како и сите инвеститори профит, но сето тоа во рамките на законите кои владеат во Македонија, а не инвеститори - манипуланти кои ја изманипулираа Македонија како акционер, манипулираат со капиталот и за заокружување на целата работа ќе ги изманипулираат и вработените.