Претходен број

Трендафилов исклучен од ВМРО-НП

Претседателот на ВМРО-Народна, Ѓорѓи Трендафилов, исклучен е од партијата. Исклучувањето на Трендафилов е констатирано на завчерашната седница на Извршниот комитет на партијата, а како причина се наведува неговата неактивност во ВМРО-НП. Членовите на Извршниот комитет одлучиле во текот на овој месец да се избере в.д. претседател кој ќе го замени Трендафилов и ќе раководи со партијата до одржување вонреден конгрес.

„Трендафилов за време на вршењето на функцијата претседател на ВМРО-НП со своето поведение и неактивност и' нанесе огромна и ненадоместлива штета на партијата, го донесе нејзиниот рејтинг на најниско можно ниво и и' го загрози опстанокот“, се вели во вчерашното соопштение на ВМРО-Народна. Во него се потенцира дека Трендафилов од првиот ден на неговиот избор за прв човек во партијата почнал со грубо кршење на актите на партијата, а не свикувал и седници на Извршниот и Централниот комитет иако, според Статутот, треба да се свикуваат најмалку еднаш на три месеци. Како причина се наведува и дека тој не бил активен со општинските комитети, како и неактивниот однос кон партијата во која се појавил десетина пати. На Трендафилов му се забележува и тоа што не ги формирал телата, органите и комисиите во партијата и ги суспендирал останатите партиски тела.

Членови во партијата наведуваат дека залудни биле нивните бројни обиди да го вразумат Трендафилов, кого, наводно, го предупредувале за последиците од неговата неактивност во партијата, но попусто. Одлуката за негово исклучување ја донеле, како што велат, поради неговата апатичност која целосно ја минимизирала партијата. (Ж.Х.З.)