ЕДИТОРИЈАЛ

Кои пратеници имаат интегритет

Александра М. Митевска

Лидерот на ВМРО-ДПМНЕ, премиерот Никола Груевски нема претстава што се случува во пратеничката група на неговата партија. Не знае каква дискусија може да очекува од сопартијците во парламентот кога некој од неговите министри ќе се појави на собраниската говорница да брани закон што тешко се одбранува. Не може ни да замисли какво незгодно прашање би можело да му долета од некој пратеник на ВМРО-ДПМНЕ, кога ќе се појави на седница за пратенички прашања.

Но, премиерот е подготвен да ризикува, подготвен е да ги издржи и евентуалните удари од најблиските... Само за да докаже дека пратеничката група на неговата партија не се вклопува во генералната перцепција за законодавниот дом како гласачка машинерија. И да покаже дека не е вистина оти Владата го контролира парламентот, како што се озборува во јавноста, туку дека ситуацијата е обратна, каква што би требало да биде ако работите се одвиваат според теоријата.

Тоа, пак, што пратениците од ВМРО-ДПМНЕ речиси секогаш гласаат идентично, впрочем, како што се изјаснуваат и нивните опоненти од опозициските редови, е чиста случајност или можеби е резултат на нивното политичко зреење во иста идеолошка средина.

Пратениците од СДСМ, пак, се сосема друга приказна. Тие немаат интегритет, не размислуваат со своја глава, не одлучуваат по сопствено убедување. Така ги воспитал нивниот лидер Бранко Црвенковски уште кога бил премиер - да дејствуваат според неговото расположение. Ако некој не верува, може да го праша министерот за надворешни работи, Антонио Милошоски. Тој веќе ја дијагностицираше состојбата на пратеничката група на социјалдемократите, поради чудните симптоми што тие ги манифестираа, преку ноќ решавајќи да се откажат од сите барања и повторно да се координираат со спикерот Трајко Вељаноски. Следуваше терапија, според која, во иднина би било полезно македонското Собрание да одлучува во согласност со своите убедувања и согласно со интересите на државата.

Па, нели рековме дека пратениците на ВМРО-ДПМНЕ одлучуваат самостојно? А, нели тие беа најбројни во парламентот, ги има повеќе од 61...!?

Всушност, и Груевски знае понекогаш да ги искара пратениците. Ама тоа, главно, се пратеници од опозицијата. Пред неколку дена, на пример, тој ги искритикува дека намерно го кочеле донесувањето на собранискиот Деловник за Македонија да не добие позитивен извештај од Европската комисија.

И за чудо, критиката стигна до самиот опозициски врв и таа, веројатно, била прифатена како добронамерна, бидејќи неколку дена подоцна лидерот на СДСМ објави дека пратениците од неговата партија ќе се вратат на координациите, ќе се откажат од барањето за формирање комисија за контрола на ревизорските извештаи и ќе прифатат каков било деловник што ќе го понуди ВМРО-ДПМНЕ. Така, според Црвенковски, опозицијата ќе придонесе за функционален политички дијалог, а со тоа и за поповолен извештај за напредокот на земјата во исполнувањето на европските критериуми.

Но, се излажаа сите што помислија дека конструктивноста на опозицијата, макар и да станува збор за нејзин дневно-политички трик, ќе биде поздравена од власта, која нели инсистираше да се деблокира донесувањето на Деловникот пред затворањето на извештајот на ЕК. Честитки дојдоа само од некои амбасади, а ВМРО-ДПМНЕ повторно се реши за критика. Веројатно пресметале дека ќе соберат повеќе политички поени ако намуртени ја прифатат понудената рака. Или мислеле дека Црвенковски очекува да добие пофалба од нив, па одлучиле да му го расипат ќефот. Не се тие како пратениците од СДСМ, па да дејствуваат во согласност со неговото расположение!