Пасош во фотофиниш за почеток на одморот
Ако се јавите денеска за пасош по редовна постапка, ќе ви закажат во септември
Горан Адамовски
За фотографирање и за аплицирање оди лесно, а подигањето на готовите лични документи потешко. Вака во кратки црти функционираат работите во Управното одделение на Секретаријатот за внатрешни работи (СВР) Скопје во зградата на Македонската радио-телевизија. Екот на летото, како по обичај, го зголеми бројот на барателите за пасош, додека за лични карти има вообичаен интерес.
Бесплатната телефонска линија 080019292 за закажување термин ќе ја добиете од прв обид. Ако се јавите денеска, службениците ќе ви го понудат крајот на јули за аплицирање за лична карта, додека за пасош првиот слободен термин е почетокот на септември. Тоа значи дека летото ќе го пропуштите, освен ако не се одлучите за добивање пасош по брза постапка, кој ќе ве чини околу 5.000 денари.
Според информациите од МВР, овие граѓани добиваат термин за аплицирање уште наредниот ден откако ќе се јават на телефонскиот број или, пак, ја искористат шансата за закажување преку интернет на официјалната страница на Министерството за внатрешни работи (www.mvr.gov.mk).
„Да закажеш не е проблем сега, метеж веќе нема толку, па не оди тешко ниту аплицирањето. Ќе си дојдеш во терминот што ти го закажале и ќе завршиш работа бргу. Ама да го земеш пасошот, може да биде комплицирано“, ни вели еден повозрасен скопјанец, кој вчера трпеливо чекаше во зградата на МРТВ да види дали е изготвен неговиот личен документ. Тој вели дека бил на сликање пред еден месец. Чекал да добие СМС-порака на мобилен телефон дека пасошот му е изготвен и оти може да дојде да си го подигне.
„Пријателите ми рекоа дека се случува да не ти пратат порака, а пасошот да ти биде готов, па дојдов да проверам оти за десетина дена треба да одам на море“, раскажува скопјанецот.
Просторијата за подигање на готовите биометриски документи се наоѓа од спротивната страна на зградата, поточно, од нејзиниот главен влез. Штом се качите на катот, треба да се пријавите на шалтерот каде што го заведуваат вашето име и презиме. Ќе ви речат да почекате да видите дали ќе се прочитате на мониторот. Ако биде така, значи дека личниот документ по кој сте дошле е готов. Тогаш одите во „главната просторија“ каде што се шалтерите со готови лични карти и пасоши. Ќе почекате да дојдете на ред и за кратко време ќе го добиете тоа што го сакате. Работата е што може да чекате со часови, а, сепак, на крајот да ви кажат дека „документот е во изработка“.
„Пред две недели дојдов директно по работа. До 20 часот останав тука и не завршив работа“, ни се жали една девојка, која вчера, сепак, имаше среќа и без многу чекање ја извади личната карта.
Службениците објаснуваат дека поголем метеж за издавање на готовите документи се правел во попладневните часови, како и тоа дека сите брзале да извадат пасоши пред почетокот на летото, а дека сега е опуштено.
И навистина, вчера кога екипата на „Утрински весник“ изврши увид во Управното одделение, работите се одвиваа без поголеми нервози. Климатизираните простории нудат спас од горештините, а иако беше петок, ден во кој поради бесплатните автобуски билети за пензионерите се создава поголем метеж, немаше голема раздвиженост низ шалтерите. Од око, барем, се добива впечаток дека се' може да заврши за десетина минути, иако одвреме-навреме понекој граѓанин откако ќе дознаеше за што сме дошле, ќе ни се пожалеше дека „губи драгоцено време“ и ни сугерира да напишеме дека „не се ажурни“.
Од МВР вчера ни соопштија дека досега биле издадени 1,211.833 биометриски патни исправи, од кои речиси 67.000 биле од „втората“ генерација.
„Тие се чекор понапред од првата генерација во смисла на заштитата. Во нив е вметнат втор елемент во чипот - отпечатокот на прстот“, објаснува Иво Котевски, помошник-министер за односи со јавност при МВР.
Издадени се и повеќе од 1,150.000 лични карти, како и 344.927 нови возачки дозволи. Како што е познато, до април 2012 година сите граѓани мора да имаат биометриски лични карти, пасоши и возачки дозволи. |
