Брисел не сака да го дели Западен Балкан
ЕУ нема да ја менува стратегијата за регионов секоја недела
Од нашиот дописник
Слободанка Јовановска
Брисел - Европската унија го создаде Западен Балкан и нема намера да го испрати во историјата, ребрендирајќи го во две групи земји - е категоричната најава од официјалните кругови во Брисел, по јавното промовирање на т.н. Јадранска група и Централен Балкан од страна на Европскиот совет за меѓународни односи.
Во Европската комисија порачуваат дека до нив не ни стигнала таа идеја, но и да е тука, немаат намера да ја менуваат стратегијата секоја недела, бидејќи најновата е прилично нова, од март годинава и ќе биде потврдена на министерскиот состанок во Луксембург токму денес. Во неа, како што се потенцира, нема ништо што асоцира на поделба на регионот на Западен Балкан во две групи, една која се движи побрзо до ЕУ и втората која заостанува, дотолку повеќе што тоа би било контрапродуктивно и за самата Унија, која со месеци се обидува да ја увери Србија да ја прифати европерспективата, а сега ќе треба да и' каже дека е во назадната група.
И експертите за Балканот во Брисел ја отфрлаат идејата за формална поделба на регионот од страна на Европската унија, оценувајќи дека тоа би било контрапродуктивно, особено сега кога и без тоа е заглавен процесот на евроинтеграцијата.
„Србија се' уште не знае каква иднина сака, иднината на Косово е несигурна, БиХ напредува многу бавно, а Македонија е блокирана поради спорот околу името со Грција. Всушност, во моментов ситуацијата во Централен Балкан не е многу ветувачка и, ако се подели по оваа линија регионот, би било многу лошо“, смета Гералд Кнаус од Европската иницијатива за стабилност.
Според него, нема никаква формална стратегија да се ребрендира Балканот, туку само се констатира она што сега реално постои во регионот, односно чувството дека земјите од т.н. јадранска група напредуваат многу повеќе од остатокот, со тоа што Македонија треба да го фати чекорот со нив и да не дозволи да се најде назад, со Србија, БиХ и Косово.
Според експертите во Брисел, повод за ваквото гледање на регионот е упатувањето на поканите за прием во НАТО на Хрватска и на Албанија, очекувањата Тирана и Подгорица бргу да поднесат апликации за членство во ЕУ и отворањето нови преговарачки поглавја меѓу Загреб и Брисел, што го прави пореален приемот на Хрватска во блиска иднина во Унијата.
Генерално, сите објаснуваат дека во моментов нема конкретни иницијативи да се подели повторно регионот, како што се подели веќе еднаш Југоисточна Европа, но дека ќе биде добро ако земјите во него самите се ребрендираат, односно ако го забрзаат движењето кон ЕУ. Пораката е дека на регионот му треба нов моментум, но дека политиката на ЕУ во моментов не помага многу во тоа, бидејќи дава конфузни резултати.
|
