Кој ќе го контролира прислушувањето на МВР?

По усвојувањето на измените на Законот за електронски комуникации со кои МВР ќе може без судски налог да следи Интернет и телефонски комуникации, се постави дилемата кој сега ќе ги штити граѓаните од упадот во нивната приватност. На вчерашната дебата „Заштита на личните податоци при нивното медиумско објавување“ организирана од Фондацијата институт отворено општество и Дирекцијата за заштита на личните податоци се отвори и прашањето за тоа како граѓаните ќе се штитат од донесени измени МВР да ја следи секоја комуникација без ограничување.

Од ДЗЛП велат дека тие имаат надлежност да постапуваат единствено по барање на граѓаните доколку тие од МВР не добијат информации за тоа дали е вршен увид во нивната лична комуникација.

„Дали вашите податоци се обработуваат е регулирано со Законот за полиција, според к��ј, секој граѓанин има право да се обрати до МВР и да побара информации дали некои негови лични податоци се обработувани и на кој начин. Ако не сте задоволни од одговорот или МВР воопшто не ви одговори, тогаш граѓанинот има можност да се обрати до Дирекцијата за заштита на личните податоци. Ние потоа ќе можеме да отвориме постапка и да побараме од МВР, односно во Центарот за обработка на податоци да видиме кој и зошто вршел увид“, вели Елена Стојановска од ДЗЛП. Таа додава дека доколку се утврди дека прислушувањето било неоправдано, се носи решение за натамошна постапка.

Измените на Законот за електронски комуникации, кои се спротивни на Уставот, овозможуваат МВР арбитрарно и неограничено да ги прислушкува сите комуникации на граѓаните. Последиците ќе бидат огромни, бидејќи сега и законски ќе се следи целата комуникација на граѓаните без можност да се спречат злоупотреби.

„И да не постои реална можност за злоупотреба доколку не се следат поставени стандарди може да дојде до непочитување на тие одредби. Нашата надлежност во делот на вршење проверка е токму таа да видиме дали увидот се врши во токму определената законска цел“, истакнува Стојановска.

На вчерашната трибина беше укажано и дека медиумите кога пласираат информации треба да прават процени дали изнесувањето лични податоци повредува нечија приватност. Од нив се бара примена на соодветни мерки за заштита на идентитетот на луѓето за кои се пишува. Генералните препораки се замаглување на ликот, користење иницијали, како и согласност од лицето што е снимено. Овие препораки се изземаат доколку снимањето или фотографирањето е на јавни настани. (Св.У.)