Дали ќе има судир меѓу компетенциите на мисијата во Брисел
Од нашиот дописник Слободанка Јовановска
БРИСЕЛ - Македонската амбасада во Брисел беше презафатена вчера за да реагира на именувањето на новиот специјален претставник на Македонија за ЕУ, што е прв сигнал дека Дејан Ѓоршовски таму не го чека којзнае какво добредојде и оти, како и на неговиот претходник Никола Димитров, најголем проблем ќе му биде судирот на компетенции во рамките на мисијата.
Она што е новина овојпат е дилемата дали именувањето на Ѓоршовски, кој речиси до вчера работеше за Брисел, а не за Скопје, ќе отвори конфликт на интереси и на релација Влада и Европска комисија и дали тоа може да значи дека место помош ќе стане пречка за нашите амбиции во Унијата.
Извори од Брисел вчера, сепак, ја симнуваа „топката“, оценувајќи дека барем засега не гледаат проблем во именувањето на новиот специјален претставник со „двојна капа“ и оти такво прашање не е отворено досега во круговите во Унијата. „Не мора да биде пречка“, оценуваат во Брисел, додавајќи дека неговото познавање на состојбите, на прашањата и на фукционерите во ЕУ може да биде од корист и за Македонија и за Унијата, дотолку повеќе што важи за компетентен во оваа сфера.
Сепак, именување на Ѓоршевски го отвора прашањето за паралелната дипломатија на Владата, која може да се протолкува како одраз на силната желба Македонија да оди напред во евроинтеграцијата, но и како израз на недовербата кон дипломатите, кои сега, по редовна линија работат во нашата мисија во Брисел. Познато е дека веќе подолго време на сесиите на Европскиот парламент, покрај дипломатите од Брисел, патуваат и претставници од МНР, при што неофицијално вторите имаат главна улога, а првите ја задоволуваат формата.
Па, така, странска државјанка ангажирана од МНР од Скопје патува за Стразбур за да ги следи сесиите на ЕП, работејќи го тоа што треба да го заврши нашата мисија во ЕУ. Освен инцидентот во Владата пред некоја година, кога премиерот изрази недоверба во оцените што ги пренесе амбасадорот Блерим Река како оцени на ЕУ за состојбите во Македонија, официјално никој досега не ја ставил под знак прашање успешноста на неговата амбасадорска функција, иако сега веќе редовно добива специјални претставници да го дополнуваат.
Не остана незабележано, исто така, дека за време на мандатот на Река експретседателот Бранко Црвенковски имаше значително подобар третман од премиерот Никола Груевски во Брисел, па се случи и тоа Али Ахмети да добие ист третман, па и подобар од нашиот премиер. Познато е дека премиерот Груевски редовно одбива македонските амбасадори да го пречекуваат и испраќаат во и од Брисел, а се случува и делегации да престојуваат во ЕУ, а нашата мисија овде воопшто да не биде инволвирана во тоа.
Иако оцените во октомврискиот извештај ќе зависат многу повеќе од тоа што ќе напише Ерван Фуере отколку о�� она што ќе го сработи нашиот нов специјален претставник, сепак, Владата барем ќе нема шанса идните неуспеси да им ги препишува на некои други. Какви, пак, се шансите на Македонија да добие конечно датум за преговори може да се знае веќе денес, по обраќањето на еврокомесарот Оли Рен во Европскиот парламент, што е прво по усвојувањето на клучните закони во нашето Собрание.
Како прв сигнал за третманот на Македонија е поканата на министерот Антонио Милошоски да учествува во петок и во сабота на неформалниот министерски состанок на ЕУ во Стокхолм, од каде што, според шведски извори, сепак, нема да произлезе некоја конкретна препорака или одлука, а веројатно нема ниту да се дискутира за проширувањето, иако имаше такви најави.
