Насловна

Вранишковски ќе ја тужи Македонија во Стразбур

Ексвладиката ќе се обиде да докаже пред Европскиот суд дека немал фер судење во Македонија

Гордана Дувњак


Расчинетиот владика на МПЦ Јован Вранишковски и актуелен српски егзарх на непризнатата ПОА ќе ја тужи Македонија пред Европскиот суд за човекови права во Стразбур. И покрај рокот од шест месеци во кој може да се поднесе тужбата, одбраната на контроверзниот ексвладика планира да го направи тоа во наредните два месеца. Тужбата ќе се темели на најмалку две повреди на Европската конвенција за човекови права. Прво, дека на Вранишковски државата не му обезбедила фер судење и второ, оти тој е осуден за непостојно дело мотивирано од политички причини.

Во Македонија се исцрпени сите правни средства откако неодамна и Врховен суд го одби барањето на одбраната на Вранишковски за вонредно преиспитување на пресудата. Тричлениот судски совет на чело со претседателот на Врховен суд, Јово Вангеловски, го одбил вонредниот правен лек како неоснован бидејќи оценил дека нема причина за преиспитување на пресудата донесена од велешкиот Основен суд, која беше потврдена и од скопскиот Апелациски суд. Расчинетиот владика е осуден во отсуство на казна од две години и шест месеци, а истовремено е задолжен да врати 14,8 милиони денари со камата, која тече од 23 февруари 2004 година.

Битолскиот адвокат Васил Георгиев вели дека неговиот клиент ја продолжува правната битка, но овој пат пред меѓународните судови.

„Пред малку повеќе од една недела ја добив одлуката на Врховен суд и сега планирам да му ја доставам на мојот клиент. Очекувам во текот на идната недела документите да му ги доставам преку неговите соработници од ПОА, кои се сместени во Нижеполе“, подвлекува Георгиев. Тој вели дека со својот клиент не се слушнал веќе еден месец, позната му е неговата намера за поднесување тужба до Стразбур.

Според информациите на адвокатот, Вранишковски моментно се наоѓа во Грција, но постојано е во движење и во посета на сестринските православни цркви. Челникот на ПОА е надвор од Македонија, повеќе од две години. Нему му се судеше во отсуство за финансиска проневера на црковни пари од МПЦ во времето кога бил надлежен архијереј.

На 15 ноември минатата година бугарските гранични власти постапувајќи по потерница на Интерпол, го уапсија на граничниот премин Калотина на бугарско-српската граница кога беше задржан во екстрадиционен притвор. Но, Апелациониот суд во Софија во јануари оваа година го одби барањето за екстрадиција и му ја укина забраната на за напуштање на Бугарија. Судот оценил дека судскиот процес против поранешниот владика на МПЦ е политички мотивиран и го пушти на слобода.

Македонските судски органи го водеа судскиот процес против Јован Вранишковски повеќе од пет години. Последната пресуда на велешкиот Основен суд е трета едноподруго откако претходните две донесени од сега разрешениот судија Валентин Зафиров беа ослободителни. За разлика од Зафиров, судијката Тања Милева го прогласи Вранишкоски за виновен.

Расчинетиот архијереј беше во служба на МПЦ во периодот од 24 јуни 1998 до 9 јули 2002 година кога беше владика дури во три епархии: Преспанско-пелагониската, Повардарската и Брегалничката.

Тој се товари дека противправно присвоил 21 милион денари, пари што му биле давани на рака од различни цркви и манастири што ги присвоил и со нив купувал луксузни возила, кои потоа биле продавани и присвоени од негови блиски луѓе.

Одбраната на Вранишковски се обидуваше да докаже дека тој е жртва на монтиран политички процес, чија цел е фаворизирање на МПЦ и оти со ништо не ја оштетил Црквата.

Случајот „Вранишковски“ дополнително го влоши и онака комплицираниот црковен повеќедецениски спор меѓу МПЦ и СПЦ. Српската црква не криеше дека го финансира постоењето на паралелната црква во Македонија, која имаше цел да ја разнебити Македонската православна црка и да ги преземе нејзините верници.