Маката на стечајците кулминира со инцидент

Стечајците најавуваат продолжување на протестите

Оливера Војновска

Неизгласувањето на законот за стечајците завчера во доцните вечерни часови кулминираше со инцидент во парламентот меѓу опозицијата и собраниското обезбедување. Набрзо по завршувањето на седницата, некаде по 21 часот, во Собранието се случувала вистинска драма, за која власта и опозицијата имаа различни верзии.

Тензиите најнапред започнале пред собранискиот влез (на кој цел ден чекаа стечајните работници), а потоа се префрлил внатре во Собранието. Според официјалната верзија на МВР, по завршувањето на собраниската седница пратеници од опозицијата со „туркање, притискање и влечење нападнале полициски службеник задолжен за обезбедување на Собранието“. Опозиционерите раскажаа сосема поинаква приказна.

Настанот го доквалификуваа како невиден преседан и тврдеа дека „неидентификувано лице ги снимало пратениците на СДСМ како разговараат со стечајните работници, кое одбило да се легитимира, а подоцна било заштитено од алфи кои не им дозволиле на опозиционерите да се движат низ Собранието“. СДСМ тврди дека воопшто немало физички контакт меѓу нив и обезбедувањето.

Пратениците од СДСМ вчера и завчера низ собраниските ходници, а посебно пред салата каде што се одржуваат пленарни седници, забележале дека се шетаат алфи. Министерката Гордана Јанкулоска неколку пати категорично негираше дека во парламентот имало алфи. Според неа, во Собранието имало вообичаено обезбедување, некои од луѓето биле во униформа, некои не.

Собранието, инаку, вчера претпладне не заседаваше. СДСМ ја напушти седницата со обвинување дека „власта прави пуч врз законодавниот дом“. Спикерот Вељаноски апелираше да се смират страстите и ја повика опозицијата да се врати во пленарната сала. „Да не дозволиме законодавниот дом да биде заложник на нечии интереси“, повика Вељаноски, но опозиционерите не се вратија. Претходно Вељаноски имаше координација со пратеничките групи на која присуствуваше и министерката Гордана Јанкулоска. Пратениците од албанскиот блок, ДУИ и од Нова демократија, вчера стоеја настрана од овој инцидент. Сепак, попладнето во парламентот се појави лидерот на ДУИ, Али Ахмети, упатувајќи се во пратеничката група на интегративците.

Пратеникот Владо Бучковски вчера на новинарите им раскажуваше дека по завршувањето на седницата тој заедно со другите пратеници од опозицијата излегол пред Собранието лично да им ја соопшти веста на стечајците. Тогаш пратеничката Весна Бендевска забележала неидентификувано лице, кое ги снимало стечајците и пратеничката група. „Побаравме од него да се легитимира, а тој ни кажа дека е приватно лице и тука е во приватно својство. Побаравме асистенција од собраниското обезбедување, влеговме внатре во парламентот и тогаш дојде до немила сцена каде што дел од вооружени лица, кои беа во цивил, направија ’шпалир‘ и го извлекоа снимателот и нас не' спречија да се движиме низ Собранието“, вели Бучковски.

Шефот на Кабинетот на премиерот Никола Груевски, генералниот секретар на ВМРО-ДПМНЕ, Мартин Протоѓер, на брифинг со новинарите го оцени инцидентот како валкана политичка игра на лидерот на СДСМ, Бранко Црвенковски. „Вакво сценарио и валкана политичка игра му одговара само на Црвенковски, тој може да вирее само во ваква ситуација“ рече Протоѓер. Тој уште кажа дека Владата и ВМРО-ДПМНЕ се згрозени од настанот, нагласувајќи дека „инцидентот е дел од сценариото на опозицијата која подолго време прави обиди да пласира и да создаде перцепција дека некој се обидува да ги репресира“. Се' до вчерашниот настан тоа го сфаќале како една легитимна политичка битка, но како што рече тој, инцидентот што се случи во Собранието може сериозно да влијае врз имиџот на државата и да ја загрози нејзината перспектива.

Координаторот на пратеничката група на ВМРО-ДПМНЕ, Силвана Бонева, изјави:„За жал, тоа што можевме да го видиме пред малку од снимките што се направени внатре и надвор можеме да констатираме само едно - дека силеџиското однесување, кое не успеаја да го направат внатре во Собранието на пленарната седница, го направија по завршувањето на седницата физички напаѓајќи едно полициско службено лице. Го повикуваме менторот на овие валкани игри, Црвенковски, да се сопре во име на подобра иднина на Македонија, во име на 98 проценти граѓани што очекуваат Македонија да биде дел од ЕУ, да престане со ваквите валкани игри и да се вратат пратениците на СДСМ во Собранието“, рече Бонева.

Вчера, инаку цел ден се редеа брифинзи и изјави во Собранието.

Потпретседателот на Собранието, Јани Макрадули од СДСМ, ги обвини премиерот Груевски, спикерот Вељаноски и ВМРО-ДПМНЕ дека наместо да сторат се' за да обезбедат вистински политички дијалог, тие со секој свој потег ја деградираат парламентарната демократија. Тој изјави дека неидентификувано лице го снимало разговорот на пратениците со стечајците, кое одбило да се легитимира. „И покрај нашето инсистирање да ни се каже неговиот идентитет, тој не го стори тоа. Лицето во маица најпрво рече дека снима приватно. Нашите пратеници се идентификуваа со безбедносниот сертификат. Тој наместо да се идентификува, вооружените лица во цивилка го спроведоа, а нас не' спречија да се движиме низ Собранието“, изјави Макрадули. Тој тврдеше дека таа на претпладневната средба со нив и со Вељаноски прикажала негова лажна изјава за настанот.

Имено, споменатиот припадник на МВР и вчера беше во Собранието, а кога опозиционерите го видоа, ги повикаа телевизиските камери за да го снимат. Макрадули објасни дека во моментот кога пратениците отишле во канцеларијата на собраниското обезбедување да пријават дека пред салата повторно има вооружени лица, виделе дека тој тогаш дава изјава за настанот. Пратеникот Горан Мисовски од НСДП, кој, исто така, се споменува како еден од учесниците во инцидентот, тврдеше дека завчера се случил класичен полициски притисок врз пратениците од опозицијата.

Министерката Јанкулоска негираше дека презентирала лажна изјава на полицискиот службеник за инцидентот во Собранието. „Најостро го демантирам ваквото тврдење на опозицијата, бидејќи фактите го говорат токму спротивното. Полициските службеници веднаш по завршувањето на настанот, како што налагаат професионалните стандарди, направија службена белешка и го предадоа видеоматеријалот што беше презентиран на утринската координација кај претседателот на Собранието, а подоцна беше презентиран и пред претставниците на медиумите. Во најмала мера би било коректно да му се извинат на полицискиот службеник“, рече Јанкулоска на брифингот со новинарите.

Претходно министерката, во изјава за медиумите, кажа дека „снимките од безбедносните камери покажуваат кој е одговорен за инцидентот во Собранието“. Вакви снимки што доставило МВР до Вељаноски им беа поделени на новинарите. „На средбата го убедив претседателот на Собранието дека МВР ќе постапи согласно со професионалните стандарди заради расчистување на овој инцидент, затоа што од она што можевме да го видиме, евидентно е дека полициски службеник распореден на обезбедување на објектот на Собранието бил попречен во извршување на своите редовни работни задачи. Притоа била загрозена неговата лична безбедност и бил оневозможен да ја заврши работната задача што му била доверена“, изјави Јанкулоска.

Јанкулоска им објаснуваше на новинарите дека вообичаена практика е кога има потенцијален ризик за нарушување на јавен ред и мир, а тоа најчесто се случува кога има масовни собирања, одделението што работи на дефанзивно електронско и физичко обезбедување да ги документира настаните и доколку се случи инцидент, да имаме видеозапис. Таа демантираше дека припадници на обезбедувањето му забраниле движење на пратеник од опозицијата и оти во зградата на Собранието имало припадници на алфите. „Што точно се случило се гледа од камерите од внатрешното обезбедување и од видеозаписот од камерата што ја има снимката од надворешното обезбедување. Мислам дека една слика е посилна од многу зборови“, рече министерката.

МВР имаше и писмена реакција за инцидентот во кој се наведува дека „ е недостоинствено за функцијата пратеник да се лажат граѓаните за инцидентот во Собранието“. За настанот се огласи и полицискиот синдикат, кој бара санкции за одговорните за инцидентот во Собранието.

Ова е втор инцидент во Собранието и тој допрва ќе се расветлува. Пред три години имаше скандалозна тепачка меѓу пратениците од албанскиот блок. Извештајот и заклучоците на специјално формираната Анкетна комисија никогаш не дојдоа на собраниска седница. (О.В.)

Телефонски разговор Протоѓер - Петров