Иванов се плаши од други вета во ЕУ

ОХРИД - Претседателот Ѓорѓи Иванов порача од Охрид дека вината за нерешениот грчко-македонски спор е кај македонските политичари, кои во изминатите години не најдоа начин да стават крај на овој проблем.

„Која е гаранцијата сега дека Грција ќе го почитува евентуалното решение за името и дека натам�� нема да поставува нови барања и услови кога таа и сега не ја почитува Привремената спогодба со која се обврза дека нема да ги блокира евроинтегративните процеси на земјава, запраша Иванов. Според него, наивно е да се верува дека кога ќе го смениме иметo ќе се реши се', бидејќи е можно тогаш да ни поставуваат услови Србија, Албанија или Бугарија.

Сепак, Иванов е задоволен од односот на посредникот Нимиц во преговорите, кој знае дека какво и да се донесе решение, тоа ќе значи преседан во светската историја една земја да го смени уставното име. „Тој сака детално да го испита пулсот на двете страни и затоа ние сме во постојан контакт со него. Потребни се иницијативи како од власта, така и од опозицијата, која наместо да вели дека за 6 месеци ќе го затвори прашањето, треба да дава предлози за тоа“, порача претседателот.

За Иванов нема опасност од дестабилизација на Македонија ако набргу не се реши спорот, бидејќи институциите на системот работат и функционираат одлично. Никој нема право да избира како ќе се викаме, а ни сме се обврзале на почитување на правото, што треба тоа да го прави и другата страна. Иако притисокот е најголем врз нас, ние ќе истраеме во намерата да го изнајдеме најдоброто решение за македонските граѓани - смета претседателот. Притоа тој укажа на пропустите на македонската дипломатија во минатото повикувајќи се на разговор со европратеничката Дорис Пак, од која добил информација дека Македонија ја отфрлила понудата во 1995 година да почне интеграциски процеси за членство во НАТО и во ЕУ под привремената референца. (Мк.Т.)