На Плаошник ќе никне чудо до 2014

По тригодишни археолошки ископувања, следува изградбата на вкупно 23 објекти што ќе се простираат на површина од 7.800 квадратни метри

Мики Трајковски

ОХРИД - По веќе познатиот мегаломански проект „Скопје 2014“ и неодамна обнародениот „Струмица 2014“ на локалниот разгранок на ВМРО ДПМНЕ, Охрид е третата станица во која градовите почнаа да го добиваат магичниот предзнак „2014“. Овој пат не станува збор за мајтапчиското препукување на Интернет, туку за амбициозното возобновување на Светиклиментовиот универзитет на Плаошник, кој според најавите треба да биде изграден до крајот на 2014 година, што беше доволно кај пошироката јавност да го добие името „Охрид 2014“. Пред три дена беа удрени темелите овој голем зафат со што беше означен почетокот на неговата изградба. Потребните средства ќе бидат обезбедени во рамките на капиталните проекти на Владата, финансирани директно од буџетот, а целиот проект изнесува 9 милиони евра.

По тригодишни археолошки ископувања, следува изградбата на вкупно 23 објекти што ќе се простираат на површина од 7.800 квадратни метри. Во рамки на Универзитетскиот комплекс ќе функционира редовна конзерваторска школа, со професори од признати светски универзитети, музеј на почвата на Плаошник во кој ќе бидат презентирани богатите наоди на самиот археолошки локалитет, богата Светиклиментова библиотека со стартни сто илјади наслови, седиште на Галеријата со икони, Македонскиот институт за хуманистички науки, посебен монашки простор наменет за свештени лица, афилијации на светски универзитети, како и Светиклиментова градина, како место за одмор и креативна инспирација.

Директорот на Управата за културно и историско наследство, Паско Кузман, вели за „Утрински весник“ оти вкупната површина на целиот комплекс, кој ќе биде отворен за туристички посети, изнесува 32.000 квадратни метри, додека објектите ќе бидат изградени на површина од 7.800 м2.

„Видикот кон езерото и градот нема да се нарушат како што се шпекулира во јавноста. Целиот простор е добро осмислен. Објектите кои овде ќе никнат ќе бидат со височина од приземје и најмногу два ката што доволно зборува дека водевме сметка за целокупниот изглед“, вели Кузман.

Тој негира дека голем дел од шумата на Плаошник ќе биде исечена на сметка на градежните активности таму. „Ќе бидат исечени само неколку дрва. Тоа ќе биде неопходно за да го направиме она што е зацртано со проектот, но станува збор само за неколку дрва кои воопшто нема да го нарушат природниот амбиент во тој дел на Охрид. И она што ќе се сече е со посебна дозвола од Министерството за екологија“, вели Кузман, додавајќи дека сите објекти ќе бидат сместени во четири одвоени комплекси кои меѓусебно ќе бидат поврзани со посебни патеки. Единствено ќе биде одделен делот каде што ќе бидат лоцирани филијалите на неколку светски универзитети.

Се' што беше досега пронајдено од археолошки пронајдоци ќе биде конзервирано и презентирано во самиот комплекс. Помеѓу сите објекти со проектот е предвидено да има специјални патеки по кои гостите би поминувале, а истовремено би се запознавале со сето она што беше пронајдено, а со тоа и со цивилизациите што живееле на овој простор, објаснува Кузман. „Од ископините единствено ќе бидат достапни остатоците од некогашните конаци на манастирот ’Свети Климент‘ кои ќе можат да се видат со голо око, а овде ќе биде стационирана и Светиклиментовата градина за одмор“, вели Кузман.

Иако станува збор за државно земјиште, корисничкото право за поголем дел од просторот на Плаошник го имаше општина Охрид, односно ЈП „Охридски комуналец“.

„За да се забрзаат постапките за изведување на градежните работи, на последната седница на Советот на Општина Охрид беше донесена одлука истиот овој простор повторно да го вратиме во владение на државата“, вели Бранко Арнаудов, началник на Секторот за урбанизам во Општина Охрид. Тој вели дека изградбата на овој комплекс била предвидена и со локалната планска документација, која била донесена за овој дел на Охрид. Според него, новите објекти што ќе никнат таму воопшто нема да влијаат, односно нема да ја нарушат статиката и изгледот на старото градско јадро. „Напротив, ќе се води сметка сите објекти што ќе никнат да бидат вклопени во амбиентот што владее таму. Целиот локалитет и во иднина целосно ќе биде отворен кон езерото, објектите кои ќе бидат изградени ќе бидат на поголемо растојание еден од друг, што значи дека нема да има какво и да е нарушување на досегашниот изглед“, вели Арнаудов.

Еден од главните архитекти е младиот архитект од Охрид Горан Патчев, додека целиот надзор и главен носител на сите активности ќе биде Охридскиот завод и музеј.

Премиерот Груевски, на свеченоста пред неколку дена во својот говор, на шега рече: „Еве, случајно или намерно, но повторно имаме уште еден проект што треба да се заврши до крајот на 2014 година“. Министерката за култура, Елизабета Канчевска - Милевска, посочи дека станува збор за капитален проект на Владата и на Министерството за култура, како резултат на многуте истражувања и процесот на реставрација на целокупниот локалитет. „Овде на просторот на првиот славјански универзитет во светот, првото академско лечилиште за телото и душата на луѓето од Велика и Кутмичевица, археолошкиот локалитет Плаошник започнува нова ера на духовното егзистирање на Охрид и на Република Македонија. Ова е нова страница од житието на славјанската култура“, рече министерската за култура, Елизабета Канчевска - Милевска.

Што ќе содржи комплексот

1. Конзерваторска школа
2. Музеј
3. Светиклиментова библиотека
4. Седиште на Галеријата со икони
5. Македонски институт за хуманистички науки
6. Посебен монашки простор
7. Афилијации на светски универзитети
8. Светиклиментова градина...