Катерина Тодевска

ТВ-водителка

Од 2 мај годинава, будењето, а и текот на целиот ден ми го диктира ќерка ми Јана, која со своите два и кусур месеца е вистински ранобудник. Значи, вообичаено отворам очи околу 5-6 часот, штом и' се пријаде на Јана и понатаму се' и' е посветено на неа. Чекаме да поминат најголемите горештини, па приквечер да излеземе да се прошетаме.

Роберт Билбилов

музичар

Плановите за одмор на Хаваи и Јамајка годинава малку се „замрзнати“ и чекаат подобри времиња, а во меѓувреме гледам да завршам некоја работа. Во текот на денот имам редовни обврски што не можам да ги прескокнам и покрај горештината, како на пример дистрибуирање на новиот спот во медиумите. Потоа во студио и работа додека не ми се приспие.

Маја Гроздановска - Панчева

пејачка

Летово го користиме за максимално уживање во домашни услови. И денеска со децата, наизменично, ќе се сончаме во дворот и ќе се разладуваме во базенот, без некои амбициозни планови за движење низ град. Можеби штом залади, да излеземе да се прошетаме.