Претходен број

Кампањата за инвестирање во Македонија дојде во невреме во Франција

Саркози бара да се вратат француските инвестиции во земјата, а не да се селат надвор

Од нашиот дописник
Тони Гламчевски


Нанси - Од првата рекламна кампањата „Инвестирајте во Македонија“, објавена во францускиот печат, поминаа две години. На времето, македонската кампања им послужи како алиби на противниците на проширувањето на Европската унија за време на претседателската предизборна кампања во 2007. Некои од кандидатите за претседател ја искористија кампањата на Македонија како пример за „нелојалната конкуренција“, која доаѓа од земјите од Источна Европа.

Две години подоцна, Македонија ја повторува истата работа. Во парискиот дневен весник „Фигаро“ е објавен оглас со кој се повикуваат француските претпријатија, кои сакаат да ги намалат трошоците, да инвестираат во Македонија. Рекламата на која покрај текстот за погодните услови за инвестирање во Македонија, се појавува и рака со ножици, за да се илустрира подобро намалувањето на трошоците, веднаш се најде под удар на критики на француските Интернет-форуми.

Една од најпосетените веб-страници „Арет сур леимаж“, специјализирана за коментирање на медиумите, рекламната кампања на Македонија ја објаснува како „директен повик до француските претпријатија да делокализираат во една европска земја каде што платите се разумни!“.

Пред две години, македонските претпријатија беа споредувани со полскиот водоводџија. „Но, со „македонското претпријатие се оди уште подалеку: данок од 10%, забрзана регистрација на претпријатијата и тоа што најмногу го лути компетитивната работна рака за само 370 евра месечна бруто-плата (сега таа е 400 евра). Ново социјално елдорадо!“, нагласи тогаш парискиот адвокат Родолф Бослу на брановите на најслушаното француско радио РТЛ.

Во новата македонска реклама, покрај другите погодни услови за инвестирање, се фали дека бруто-платите во Македонија се само 400 евра, а во Франција луѓето со најниски примања штрајкуваа повеќе од еден месец за да изнудат зголемување на платите за 200 евра!

Очигледно е дека намерата да се привлечат странски инвестиции е добронамерна, за тоа се залагаат сите влади и земји во светот. Но, тука се поставува прашањето дали иницијаторот на рекламната кампања бил информиран дали да се испрати повик во ова време за делокализација во една земја. Рекламата беше објавена речиси истовремено со најавата дека Франција влегува во длабока рецесија и дека се очекува да бидат изгубени 300.000 работни места како резултат на кризата, по новите рекордни 90.000 нови невработени само во јануари. Претседателот Никола Саркози, пред неколку дена, беше јасен: помошта што ќе ја добијат француските претпријатија од државата за излез од кризата ја услови со прекин на делокализацијата. И по цена да се скара со своите европски партнери. Против се и сите политички партии во Франција.

Повеќе од една година македонската Влада работи на подобрување на имиџот на нашата земја во Франција. Зачестените патувања на вицепремиерот Ивица Боцевски во Париз и неговите средби со министрите на француската влада оставија впечаток дека се одмрзнува француската воздржаност кон Македонија. Во таа насока, сигурно е дека рекламна кампања за инвестирање во Македонија нема да остане незабележана од француските политичари спроти европските избори, посебно од оние кои сакаат „повеќе Европа“, со хармонизација на законодавствата, но тргнувајќи од највисоките социјални придобивки, сега повторно ќе можат да се послужат со стравот од „македонското претпријатие“.

Плодовите од претходната кампања за инвестирање во Македонија не ни се познати. Реакциите на политичарите колку и да се остри, сепак, тие не влијаат многу врз одлуките на шефовите на претпријатијата и инвеститорите. Последниве се водени од интересот за профит отколку за социјалните грижи. Сите добро знаат дека капиталот не се грижи за моралот, тоа го призна и претседателот Саркози. Филип Херман, шеф на претпријатие од Алзас, инвестирањето во странство, во случајов во Македонија, го гледа како можност за претпријатијата да излезат на нов пазар, но моментно, според него, „потребно е да се види дали има претпријатија кои можат да инвестираат во странство. Во актуелната криза тие најнапред гледаат да ги зачуваат работните места во Франција и да го спасат самото претпријатие“.