5 прашања 5 одговори

Во екологијата нема крв, пот и солзи

Лилјана Поповска, претседателка на ДОМ

Оливера Војновска

Госпоѓо Поповска, успеа ли ДОМ да ја наметне определбата за „зелена европска Македонија“ кај коалицискиот партнер во Владата (ВМРО-ДПМНЕ)?

ДОМ успеа да ги наметне екологијата и туризмот како владини приоритети и затоа сме во владината коалиција како зелена партија. Се донесоа низа закони, стратегија за цврст отпад, плански документи за Охридскиот, Преспанскиот и други региони, се заштитија Алшар, Куклица и други токму на предлог на потпретседателката на ДОМ, Соња Лепиткова, која е и заменик-министер за животна средина. Во реализација се регионалните депонии, неколку пречистителни станици, а се надевам наскоро и инценераторот за медицински отпад. Во Законот за енергетика е внесена одредбата за обновливи извори на енергија и започнаа пилот-програмите за сончеви системи. ДОМ посебно инсистира на развој на алтернативниот и екотуризмот,со традиционална храна, занаети и музика.



Какви се ефектите од кампањата „Скопје зелен град“ што ја започна ДОМ пред една година?

Еве, ја пробиваме во медиумите. Некако се случи на промоцијата на кампањата да не дојдат медиуми, иако имаше стотина активисти и минувачи. Следуваа билборди, објави, новогодишна вечер со македонски џез-балади, песни за дрвото и зелен килим за над 1.000 пријатели на зелената опција, меѓу кои и познати имиња од јавниот живот. Но, излезе дека екологијата е табу-тема за медиумите. Или тотално неинтересна зашто тука нема крв, пот и солзи.



Убаво звучи Вашата заложба „на секое пресечено дрво да се засадат три нови“. На кои локации во Скопје е направено вакво пошумување?

Кампањата „Скопје зелен град“ ја надоврзавме на нашата Декларација за зелени општини, по локалните избори потпишана од 31 градоначалник. Се фокусираме на Скопје и на зеленилото во градот. Бараме за секое едно пресечено дрво да се насадат три нови. Ова го повторивме и преку нашиот советник во Градот, д-р Антони Новотни, и ќе продолжиме натаму се' до исполнување.



Препорачувате да се кликне ICILEI cities и „да се влезе во волшебниот свет на зелените градови“. Дали Ви�� при виртуелната посета на 1.066 зелени града во 68 земји можеби забележавте „булдожери испратени од бизнисмени и поддржани од локални функционери“ како голтаат стогодишни дрвја?

Урбаната бизнис-елита нема земја на потекло, таа е трансгранична. Сите се браќа, независно од вера, нација, политика. Ја има секаде, но полесно цвета во транзициските земји со недоуредени закони. Кај нас има направено пустош: Кинескиот ѕид, Тифани, Дебар Маало, Кисела Вода и др. Во Македонија се' уште економскиот концепт е пред еколошкиот. Развој да, но не по цена на уништување на природата и здравјето на луѓето. Така беше и со Законот за води, за чие менување по европски терк лобиравме како зелена партија неколку месеци, по што исполнивме една одредница од ЕК.



Јавноста не го слушна ставот на ДОМ за сечата на два хектара шума поради изградбата на жичарницата на Водно. Како Вие како голем поборник за чиста и здрава животна средина го доживувате ваквото уништување на зеленилото?

Сме имале низа активности за Водно: акција за чистење „И Водно е наш дом“, пресови, се' до заложби на Лепиткова на седници на Влада кога се дискутирало за интервенции на Водно, како пат, жичарница и сл. Знаете, за еколошка револуција е потребна критична маса. ДОМ се зафати со тешката задача да ја иницира. Ме радува трендот на постепеното отворање на граѓаните и медиумите кон овие теми и ќе очекувам тој да продолжи и кога нема да се очекуваат избори.