Насловна

Грчката амбасада агитира

„Славомакедонска националност“ за пописот во Австралија?

Атина - Пратеникот од грчката ултрадесничарска партија ЛАОС, Кирјакос Велопулос, во својата херојска борба со прашања кон грчките министри за теми поврзани со Грција и Македонија овој пат се фокусира на претстојниот попис во Австралија. Во допис до грчкото Министерство за надворешни работи, Велопулос посочува дека грчкиот печат од дијаспората јавува дека македонски организации во Австралија агитираат меѓу тамошните македонските граѓани на пописот на местото на државата да не пишат „Скопје или договорената меѓународна референца ФИРОМ“, туку да пишат едноставно Македонија.

Во официјалниот одговор од грчкото МНР, приложен веднаш до писмото на Велопулос се забележува дека се запознаени со таквите активности на здруженијата на македонската дијаспора и голем број, како што ги карактеризираат, фанатични групи помлади луѓе кои се однесуваат непријателски спрема се' што е грчко и провоцираат со своите активности и изјави. Според грчкото МНР, пописот за нив е уште една шанса да ги пренесат своите ставови. Во писмото се забележува дека и на претходниот попис и на новиот во 2011 грчката амбасада од Камбера, во соработка со властите во Австралија, има осигурано дека на формуларите ќе пишува ФИРОМ. Бидејќи пописот е електронски, од грчкото МНР забележуваат дека таму каде што е запишано „Македонија“, во полето на држава на раѓање во формуларот авто��атски во компјутер ќе биде пренесено како ФИРОМ.

Грчкото МНР во писмото убедува дека нивната амбасада во Камбера се обидува да издејствува, во соработка со австралиски академици, во формуларите за пописот во полето за националност да стои терминот „славомакедонски“.

Покрај прашањето за пописот, еден од последните прашања на Велопулос до грчкото МНР е дали се свесни и како дозволуваат грчкиот разгранок на организацијата „Доктори без граници“ да дели летоци, на кои има мапа каде што наместо ФИРОМ, стои Македонија, иако одговорот од организацијата е дека летоците биле печатени од шпанска компанија, која ставила мапа што се наоѓа на Интернет, без да разгледува која земја како е именувана, бидејќи тоа не ни било главната поента за пораката на летоците. (М.П.)