Претходен број

Груевски и Црвенковски, наместо став за името, пак се скараа

Груевски побарал време за осмислување на ставот на Владата за името

Тамара Грнчароска

Претседателот и премиерот на државата, Бранко Црвенковски и Никола Груевски, обидот во понеделникот да изградат заеднички став околу прашањето за спорот со името, го престорија во уште една потврда за својата непомирливост и несогласување. По средбата во кабинетот на претседателот која траеше еден и пол час и двете страни излегоа со меѓусебни обвинувања.

Црвенковски по средбата, на сметка на Груевски, рече дека „е очигледна намерата на Груевски да се избегне каква било одговорност и да се остави медијаторот Нимиц на еднострано влијание и корекции само од грчка страна“, со што, смета претседателот, се создава амбиент за многу полош предлог за Македонија. „На денешната средба не го слушнав ставот на Груевски за последниот предлог на Нимиц и тој одби повеќе мои предлози, меѓу кои и тој да се искористи можноста што ја остави медијаторот за уште една средба, заради презентирање јасни ставови на Македонија, пред дефинирање на својот конечен предлог“, соопшти Црвенковски. Шефот на државата не кажа детали за предлогот на Нимиц, бидејќи, како што рече, со тоа би и' нанеле штета на македонската преговарачка позиција. „За нас е клучно прашање да не се загрози националниот и културниот идентитет на македонскиот народ“, рече Црвенковски.

Претседателот го обвини премиерот за избегнување одговорност во целиот процес и изјаснување во врска со него. „Решение за спорот не е можно без негово директно инволвирање како премиер и како лидер на парламентарно мнозинство“, изјави Црвенковски, додавајќи дека само со заеднички напори и со поделена одговорност меѓу претседателот и премиерот на државата ќе има надеж за позитивен исход. „Го повикувам и замолувам претседателот на Владата да си ја преземе премиерската функција и одговорноста што оди со неа, заедно да учествуваме во процесот, заедно да се обидеме да издејствуваме максимално, колку што е можно подобро решение за Македонија. Одговорноста мора да се подели и од неа не може да се побегне “, рече Црвенковски. „За жал, наместо на координативна средба меѓу мене и премиерот да до��де до усогласување на ставовите и до заедничка позиција за преговорите за едно од најбитните прашања за нашата земја, таа средба заврши со потврдување на разликите што постојат меѓу нас“, изјави претседателот на државата.

Според него, „ова е клучното прашање за земјата и особено околу тоа прашање не може некој да го крие или да го одложува проблемот, бидејќи со одложувањето тој не станува помал, туку само поголем“. Црвенковски оцени дека ако нема напредок во наредните две-три недели, ќе следува најмалку едногодишен мораториум, а Македонија ќе стагнира на патот кон ЕУ и НАТО.

Груевски по средбата во својата изјава за медиумите не сакаше да изнесува детали за разговорот со Црвенковски на кој присуствуваше и министерот за надворешни работи Антонио Милошоски. „Бевме информирани за оној дел за кој Црвенковски сметаше дека треба да бидеме информирани, за неговата средба со Нимиц и за другите средби што ги имаше во Њујорк. Ги слушнавме тие работи што ни ги кажа. Останува да видиме во наредниот период каков предлог ќе ни даде Нимиц, што тој го најави за скоро, по средбата со Дора Бакојани и Црвенковски“, изјави Груевски. Тој во интерес на конструктивноста на процесот, конструктивниот пристап кон Нимиц, па и кон Црвенковски, одби да даде други детали во врска со разговорите.

Сепак вчера Груевски излезе со изјава во која го обвини претседателот за избрзан јавен настап околу името, со забелешка дека Црвенковски се исплашил од барањето на Владата да добие „само ден да оформи став за последниот пакет на Нимиц“. „Побаравме да размислиме барем еден ден за понатамошните чекори, вклучувајќи и неколку негови нови предлози, меѓу кои веднаш и итно по неговото враќање од Њујорк, Димитров и Мартин Протоѓер да заминат кај Нимиц, кој пак претходно не' информира дека по средбите со Црвенковски и со Бакојани не смета дека нови средби ќе помогнат, иако не ја исклучува можноста доколку ние инсистираме да ја прими нашата делегација“, рече Груевски. Премиерот вчера му упати нова порака на Црвенковски дека „каде и да сака и кога и да сака ќе ги испратиме Димитров и Протоѓер“. „Тој може да има колку сака јавни или тајни средби, може да договара што сака, може јавно да не' напаѓа, прифаќам се', прифаќам и да ја поделиме одговорноста, прифаќам ако сака да кажеме дека тој нема никаква одговорност, дека што и да се договори, какви да се неговиот и мојот став за ова прашање, доколку има конечен предлог што ќе го прифати и другата страна, ќе одлучи народот“, порача Груевски.

Ден претходно преку соопштение од Владата беше коментирана изјавата на Црвенковски, со оцена дека била нервозна и штетна за државата, со барање до Црвенковски да биде коректен и да не употребува навреди и лажни обвинувања.

За ситуацијата Груевски - Црвенковски вчера свое мислење даде и новиот американски амбасадор во земјава Филип Рикер, кој одговарајќи на новинарско прашање како ќе се одрази тоа врз позициите на Македонија рече дека тоа е нешто што треба да се реши. „Сметам дека македонските лидери го разбираат тоа. Ова е многу значајно време да се работи сериозно на решение“, изјави Рикер. Повторувајќи ја американската поддршка за изнаоѓање решение под покровителство на ОН, Рикер изјави: „Верувам дека тоа ќе се случи“. „Потребна е флексибилност и вистинско раководство на сите страни“, рече Рикер, додавајќи дека тоа е важно за иднината на Македонија.

За заострувањето на односите меѓу Црвенковски и Груевски вчера информираат и грчките медиуми. Според грчкиот весник „Елефтерос типос“, Груевски по средбата со Црвенковски побарал од медијаторот Нимиц да го врачи својот предлог за решавање на спорот со името директно до владите на двете земји. Весникот, повикувајќи се на дипломатски извори, објави дека е можно Нимиц, наместо да се сретне со преговарачкиот тим на двете држави во Женева, наскоро да ги посети Атина и Скопје, доставувајќи го својот предлог до политичките лидери, од кои ќе бара да се изјаснат дали предлогот е прифатен или одбиен.

Новата кавга меѓу македонскиот политички врв доаѓа само неколку дена пред најавената средба на медијаторот Нимиц со македонскиот и грчкиот преговарач, на која, неофицијално, се очекува нов предлог за решение на спорот. Грчките медиуми за „новиот и конечен предлог“ на медијаторот Нимиц за спорот со името објавија дека тој ќе содржел географска определница „Горна“ или „Северна“, а за националноста „македонска“ испишана на латиница со македонска транскрипција.

Весникот „Катимерини“, повикувајќи се на дипломатски извори, објави дека Нимиц ќе ги посети Атина и Скопје во почетокот на октомври со пакет што веројатно ќе содржи конечен предлог во оваа фаза на разговорите. Повикувајќи се на дипломатски извори, весникот објави дека Нимиц е фокусиран да добие согласност од Атина и од Скопје за „Горна“ или „Северна“ Македонија, како прифатливо решение. Според „Катимерини“, Нимиц ќе се концентрира на прашањето за националноста и ќе предложи да стои „македонска“ испишана на сите официјални документи, вклучувајќи ги и пасошите на македонските државјани.