Хаос со продажбата на возила

Ивица Димитровски

Нашата „реформска“ Влада за овие четири години колку што е на власт, направи многу реформи со кои на народот му го промени животот. Од многуте реформи што беа направени, многу малку од нив поминале без некој револт кај граѓаните, а уште помалку од истите тие реформи опстоиле подолг временски период.  

Последната реформа со која нашата Влада се отепа од фалење беше дозволата за увоз на возила постари од 15 години. Тогаш можевме да слушнеме дека Владата го направила тоа затоа што секој граѓанин не можел да купи ново возило, затоа што така ќе се легализирале веќе увезените возила од странство. Денес по цели шест месеци, состојбите се поинакви.

Како и досега, па така и сега, секое чудо за три дена, па така и оваа реформа пропаѓа во вода. Како и за се' што е направено досега, набрзина, со желба да се земе некое поенче кај народот, така и тука се дозволи увозот, но никој не се погрижи тој да биде регулиран за да не се случи хаос. Сега веќе хаосот се случи. Возила се увезувале како алва. Проблемот сега е што нема интерес за тие возила. Статистиката вели дека ако во февруари, еден месец пред да биде издадена дозволата за увоз на возила постари од 15 години, увозот на возила бил 1.000 во март кога стартувала дозволата за увоз, бројката се зголемила на 4.900. Потоа бројката се зголемува за веќе во април таа да достигне 7.700, или во јули 9.300. Таа бројка веќе во август е опадната на 3.000. Интересно е да се види и тоа дека бројката на увезени нови возила во февруари била 770, а на стари возила 90, но веќе во март бројката на увезени нови возила е 600, а на стари 3.900, а во јули бројката на нови возила е 550, а на стари 8.400.

Бројките многу јасно говорат дека работите веќе излегле од контрола. Неконтролирано увезување стари возила сега предизвикува хаос. Плацевите се полни со стари возила, но нема побарувачка за нив. Сега тие остануваат на плацевите, а нивните сопствениците почнуваат да ги нижат првите загуби. Од друга страна веќе е пореметен е увозот на нови возила. Исто така, и за тоа зборуваат бројките. Автосалоните веќе одамна бележат пад на продажбата на возилата, а со тоа и тие почнуваат да бележат загуби.

Паметам дека уште во моментот кога Владата сакаше да ја воведе таа дозвола за увоз на постари возила, имаше реакции и од експертите, граѓаните, но и од сопствениците на автосалоните за продажба на нови возила. Тогаш Владата не ги зеде предвид тие забелешки и сега нормално е да се соочиме со ваков хаос.

Токму затоа денес и автосалоните и плацевите за стари возила бележат загуби. Токму затоа денес продажбата на возила е во тотален хаос. Затоа на нашите улици сега се' почесто можат да се видат возила стари повеќе од 15 години. Возила, кои се ризик во сообраќајот. Наместо како секоја нормална и развиена земја каде што се трудат возилата да имаат и екоквалитети и да не ја загадуваат средината, кај нас се возат возила што ја загадуваат средината.

Но, кај нас за Владата не е реформа да обезбеди стандард со кој секој граѓанин би можел да си дозволи ново возило или возило постаро од 5 години, туку напротив, за нив е голема реформа да можеш да земеш возило старо 15 години.

Е па, премиере, министри, толку од вашата идеја и сон за политички поени. Заборавете го тоа зашто повторно згрешивте и направивте хаос во уште една сфера. Важно, вие ќе си се возите во автомобили од над 20.000 евра, а народот нека си се снаоѓа.