Насловна

Ако има ред во фрлањето ѓубре, контејнерите нема да мирисаат

Ѓубрето може да се фрла наутро, меѓу 8 и 10 часот,
и навечер, од 20 до 22 часот

Снежана Калабакова

Преполните контејнери со смет се грда слика во градов и никој не сака да ја гледа. Во овие летни денови уште полошо е што од нив се шири непријатна реа, недалеку од домовите на скопјани и речиси под прозорците на нивните станбени згради. За ваквите состојби во некои од населбите, па и во централното градско подрачје граѓаните најчесто ги обвинуваат комуналците. Но, се чини, не се секогаш виновни вработените од ЈП „Комунална хигиена“, бидејќи веднаш по нивното поминување, откако ќе ги испразнат садовите со смет, настапуваат оние несовесните граѓани што фрлаат ѓубре во кое било време од денот или ноќта. И не само ѓубре, туку и се' што не им требало од мебел, белата техника и други парчиња покуќнина. За сето тоа нема казни, а не казнуваат ниту комуналните редари за ѓубрето што се остава околу нив наместо во садовите наменети за тоа. А Законот за јавна чистота предвидува строга казни од 50 евра и за едно фрлено догорче. Фрлањето ѓубре во одредени термини од денот не е произлезено од Законот, туку е препорака од комуналците за воспоставување некаков ред во урбаните средини. И бидејќи и за тоа не се казнува, речиси малкумина го почитуваат терминот што стои јасно напишан на налепниците на контејнерите, дека ѓубре се фрла наутро, меѓу 8 и 10 часот, и навечер, од 20 до 22 часот. Ако веднаш по нив станарите фрлаат ѓубре, тогаш ќе ги наполнат садовите и тие ќе им стојат полни до наредниот ден. Токму затоа, велат од ЈП „Комунална хигиена“, упатно е граѓаните да ги почитуваат термините што стојат на налепниците за ѓубрето да не се прелева во контејнерите. Идејата на градот за поставување подземни контејнери е токму тоа - да го нема ѓубрето на виделина. Но, за нивно поставување ќе мора да учествуваат и општините и да се заинтересираат и градоначалниците.

„Идејата со поставувањето налепници беше токму тоа - да се воведе некаков ред и граѓаните полека да стекнат навика кога треба да го фрлаат ѓубрето. Еве веќе полека учат да го селектираат отпадот и посебно фрлаат пластика, посебно хартија. Упатно е редот за фрлање смет да се почитува за да не се гледаат преполни садови со смет. Нашата препорака сакаме да им стане навика на скопјани, не сакаме да казнуваме“, вели Јетула Амети, заменик-директор во ЈП „Комунална хигиена“.

Од „Комунална хигиена“ објаснуваат дека со индивидуалните канти ќе го решат проблемот со контејнерите. Во населбите со индивидуално домување контејнерите ќе се повлечат и ќе ги има само пред станбените згради. А за да се реализира идејата за подземните контејнери, ќе треба да се вклучат и општините, кои во ДУП-овите треба да ги зацртаат локациите за овие садови за смет. Тие ќе мора да внимаваат на подземната инфраструктура и да најдат простори на кои ќе може да се копа. Подземни контејнери за почеток ќе се постават само во општината Центар, а идејата треба да се реализира до 2012 година. Во контејнерите ќе има поставено вреќи од по 3-5 кубни метри.