Груевски молчи, ДУИ бара прво да се реши името

„Ако мнозинството има желба, тогаш парламентот може да се распушти во јануари, а изборите да се одржат до март“, посочуваат во СДСМ

Оливера Војновска


Владејачката ВМРО-ДПМНЕ е прилично воздржана за протестниот марш на опозицијата и иницијативата за предвремени избори во пакет со пречистување на Избирачкиот список и измени на Изборниот законик. Премиерот и лидер на десницата, Никола Груевски, се појави во јавноста, но не беше расположен да ја коментира опозицијата. Груевски вчера го пушти во употреба фудбалското игралиште во село Орман, постави и камен-темелник за изградба на пречистителна станица во село Волково, а, сепак, ги избегна медиумите. Молчеа и во неговата ВМРО-ДПМНЕ. Меѓутоа, се одважи коалицискиот партнер во Владата, ДУИ, од каде што порачаа „прво да се реши името, а потоа на избори“!

Спикерот Трајко Вељаноски вчера молчеше, но пред неколку месеци (кога лидерот на СДСМ Бранко Црвенковски најави дека по Самитот на НАТО во Лисабон ќе бара предвремени избори) рече дека ако опозицијата поднесе ваква иницијатива, веднаш ќе ја стави на седница. Собраниски извори велат дека самата предлог-одлука за распуштање на Собранието е непрецизна. Имено, во неа не е децидно наведено кога се бара да се распушти парламентот (како што беше иницијативата на ДУИ пред повеќе од две години), туку се вели „одлуката стапува во сила и се применува од денот на примена на измените на Изборниот законик“. Па, произлегува дека таа има одложено дејство, што се смета за нелогично и неизводливо. За правните експерти во СДСМ, пак, формулацијата на одлуката воопшто не е проблематична. Велат дека споменатата одлука, која е политичка, може да има одложено дејство, а во меѓувреме, да се донесат измените на Изборниот закон и да се прочисти Избирачкиот список. „Ако мнозинството има желба и ги стави на првата наредна седница измените во изборната регулатива и предлог-одлуката за формирање анкетна комисија, тогаш парламентот може да се распушти во јануари, а изборите да се одржат најдоцна до март наредната година“, посочуваат во СДСМ.

Социјалдемократите вчера се' уште беа под влијание на еуфоријата од претходниот ден кога протестираа низ улиците на Скопје. Тие на вчерашната собраниска седница заедно со пратениците од НСДП, ЛП и од Нова алтернатива се појавија облечени во жолти маици на кои пишуваше „Доста е -избори“. Носеа и фотографии од маршот и им ги покажуваа на колегите од ВМРО-ДПМНЕ, кои се смееја и дофрлуваа. Ваквата атмосфера дополнително се подгреа откако не помина двотретинскиот закон за органите на државната управа. Опозиционерите видно расположени аплаудираа кога се покажа дека владиното мнозинство за еден глас не успеа да обезбеди 80 гласа за донесување на споменатиот закон.

Невообичениот дрес-код на опозицијата надвор од пленарната сала го прокоментира пратеникот од Демократскиот сојуз, Павле Трајанов. „Се облекле како канаринци, веројатно, пожолтеле од страв навистина да не се случат избори“, рече Трајанов. Тој, всушност, беше единствениот од пратениците на портокаловата коалиција на ВМРО-ДПМНЕ што го коментираше предлогот за распуштање на парламентот. „Без разлика дали ќе имаме предвремени или редовни избори, СДСМ повторно ќе се соочи со сигурен пораз“, смета Трајанов. Според него, крајно лицемерно е Црвенковски и СДСМ да зборуваат за сиромаштија, невработеност, криминал, партизација, изолација.

Портпаролката на ДУИ, Ермира Мехмети, смета дека ова е сериозен момент за земјата и сите политички фактори мора да се обединат и да ја надминат блокадата предизвикана од нерешеното прашање за името со Грција. „ДУИ сака прво решение за името, па потоа избори. Избори без решение за името единствено би легитимирале, би потврдиле уште една политика на самоизолација“, изјави Мехемти, додавајќи дека нејзината партија е подготвена во секое време да оди на избори, па макар тие да бидат и предвремени. Таа напомена дека ако се земат како некој индикатор анкетите што покажуваат дека растечки евроскептицизам, прашање е која би била понудата на политичките партии. „Што би понудила опозицијата, која не се произнесува за нејзината подготвеност веднаш по евентуално преземање на власта да го реши прашањето на името“, прашува Мехмети.

СДСМ вчера искажа задоволство поради тоа што, според нивни процени, на протестот излегле на 50 илјади луѓе. Колку и да се трудеше ВМРО-ДПМНЕ преку негативна и мизерна кампања, прес-конференции, мрачни ��ценарија, приземни графити и флаери да ги одврати и да ги уплаши граѓаните од протестниот марш, во тоа не успеа. Груевски има една единствена опција. Да го прифати тоа што го бара народот и да биде поразен на предвремени избори“, изјави потпретседателот на СДСМ, Гордан Георгиев.

Во завчерашното гостување во Дневникот на телевизија Сител, Груевски за протесниот марш на СДСМ изјави дека имало само осум илјади луѓе и дека Црвенковски не понудил ништо ново. Во врска со барањата на СДСМ за предвремени избори, Груевски најави консултации во партијата и со коалициските партнери, по што ќе донеселе одлука. Премиерот додаде дека кредибилитетот на Црвенковски е рамен на нула.