Притвор за напаѓачот на таткото и синот

СТРУГА - Истражен судија при Основниот суд во Струга вчера му одреди мерка притвор на 38-годишниот Исмаил Асани во траење од 30 дена. Тој пред два дена со истрели од огнено оружје - пиштол уби едно лице, а тешко рани уште едно. Притворениот Асани,  кој отпорано и' бил познат на полицијата како нарушувач на јавниот ред и мир, во вторникот на излезот од Струга откако  со своето возило „форд“  му го попречил патот на возилото „голф“ во кое имало три лица,  го онеспособил возачот удирајќи го со пиштол од кој потоа испукал три куршуми кон Џемаил Исламили, 51-годишен жител на селото Делогожда и кон неговиот 25-годишен син Мефаил, дописник на весникот „Коха е ре“. 

Во критична состојба тие биле пренесени во струшката болница, каде што и покрај напорите, Џемаил им подлегнал на повредите, а Мефаил е опериран и се наоѓа надвор од животна опасност. Според исказите на лекарите во струшката општа болница, Мефаиљ засега е во свесна и стабилна состојба, но дека уште неколку дена ќе биде задржан на интерното одделение. Лекарите велат оти врз Мефаиљ по неколку месеци ќе мора да биде изврешен уште еден оперативен зафат токму поради сериозноста на повредите што ги добил. Погребот на таткото Џемаиљ беше извршен завчера на муслиманските гробишта во Струга. (Мк.Т.)