Што прават денеска

Славица Петровска-Галиќ

оперска певица

Вчера завршија обврските со моите студенти и постипломци - Оливера Ѓорговска дипломираше со концерт на сцената на ФДУ, а Наде Талевска на 25 јуни магистрираше со операта „Риголето“ во МНТ. Денеска веќе можам да се посветам на подготовките за мојот настап на Културно лето во Радовиш, на 15 јули и конечно да ја видам внуката, која не сум ја видела неколку дена и многу ми недостасува.

Сузана Гавазова

пејачка

Денеска ми е ден за професионален одмор и за посета на салони за разубавување. Всушност, веќе почнувам со подготовката за настапот на „Прилеп фест“, што ќе се одржи в петок, на 1 јули. Веќе утре заминувам во Прилеп, каде што треба да се одржат пробите за фестивалот.

Тоше Николовски

техничар во „Т- хоум“

Вообичаен работен ден, во кој настојувам навремено да одговорам на сите обврски и интервенции за интернет-инсталациите на корисниците на „Т- хоум“, со цел да им бидеме постојано достапни на нашите клиенти, како и да го одржиме реномето на компанијата. Попладнето е наменето исклучиво за сопругата Тања.