Понижувачка партиска ТВ-продукција од 1,6 милиони евра

Мирослав Киревски

Читам и препрочитувам, се чудам, не можам да се изначудам, Владата продолжува со недомаќинлакот, секој ден нова лудорија и расипничко трошење на парите кои народот и ги дава.

Она што пред некој ден успеа да ми ја помати сликата и да ми помогне во осознавањето за начините на делување на нашата „народна“ влада, е одлуката на Собранието за прифаќање на финансискиот план на националниот радио - дифузен сервис. Имено, собраниското мнозинство, без никаква дебата и без земање предвид на советите од опозицијата одлучи истиот да го прифати и со тоа од буџетот на Македонија, т.е. од нашите народни пари за сателитската програма на МРТ во 2010 година да одвои, ни помалку ни повеќе туку 1,6 милиони евра. Невидена лудост, повторно непотребно трошење на пари.

Наместо владата да се стреми и да вложува средства во самата институција и да и помогне на истата да развие во она што навистина треба да биде, во препознатлива и објективна телевизија, да ја опреми со потребните реквизити, да одвои соодветни плати за нејзините вработени и да ја извади од сивилото во кое со години тоне, таа само потпомага во нејзиното уништување. Наместо да ја направи пријатна за очи најпрво пред својата домашна публика, таа планира прикажувајќи ги емисиите „Иселенички џубокс“, „Томиќ - Отворено со народот“, „Таленти“ и „По глас и светлина“ дополнително планира да ја омаловажува целата земја и пред странската публика.

Јас навистина не гледам ниту една доволно добра причина, која би ги натерала Македонските иселеници да го гледаат ова понижување од партиска продукција. А уште помалку ми е јасно, дали навистина некој од ВМРО – ДПМНЕ смета дека постои некој друг, освен нивните партиски послушници, кој нема да го смени каналот, туку да се измачува и да го гледа лошиот кадар и сиво – црвената слика на екранот, преродбеничкиот владин проект наменет за перење на мозоците. Срамно, жално, а и потценувачки е за својот народ, да одвоите 1,6 милиони евра од нашите пари за промоција на проектот наменет за лечење на фрустрации, за плукање и оцрнување на македонските граѓани.

Дајте, бре луѓе, барем еднаш бидете реални, отворете ги очите, видете што направивте од државава. До кај стигна државата во која Томиќ е главен лик и зема стотици илјади евра, а квалитетните и докажани кадри во МРТВ, како и приватните телевизии се борат за егзистенција. Вакво понижување на интелегенцијата, се чини, ни Љубчо Георгиевски не правеше. Ваква ВМРОвизација никогаш не била видена. Но, верувајте, прашање на денови е кога ќе тресне од земја ваквата неодржлива и некоординира политика. Ова лудило ќе запре!