ЕДИТОРИЈАЛ

Маршот на опозициjата

Соња Крамарска

Ако само пред десетина дена Црвенковски побараше вонредни избори, неговите сопартијци ќе аплаудираа нервозно. Но, завчера тие на својот лидер му одговорија со воодушевеност на неговиот повик за вонредни избори. Тоа е очигледен сигнал дека работите кај социјалдемократите се менуваат.

По долго време зачмаеност, опозицијата покажа дека се враќа на сцената. Нејзиното враќање се случи со автобуси и со комбиња, но адресата на која возилата ги истоварија патниците даде силен политички сигнал: СДСМ се освести од клиничката смрт.

Операцијата за заживување на македонската левица трае долго време. Апаратите за вештачко дишење веќе неколку години покажуваа алармантна состојба, особено откако ривалската ВМРО-ДПМНЕ доби нов лидер. Социјалдемократите покажуваа разочараност на многу полиња. Од власта доживуваа непријатности, а партиската централа во Скопје остануваше рамнодушна на нивните поплаки.

Но, по одржувањето на митингот завчера пред Владата, може да се каже дека во Македонија почнува регуларна политичка битка меѓу власта и опозицијата. Митингот покажа дека СДСМ ја засилува внатрешната кохезија во пресрет на можните вонредни избори. Црвенковски, пак, покажа дека може да остане ладнокрвен и кога е под силен притисок, како што беа оцените дека СДСМ и неговиот лидер се нокаутирани на неограничен рок.

Иако од првиот голем настап на опозицијата не може да се препознаат пораките како „ново“ и „промена“ што се типични при контрирање на Владата, задачата на лидерот на СДСМ беше да прати порака дека ВМРО-ДПМНЕ повеќе не е сама на политичката сцена. И успеа во тоа.

СДСМ најмалку две години формулира оцени за лошо владеење на власта, за злоупотреби, за влошените меѓународни позиции на земјата. Но, тоа не наидуваше на слух ниту во самата партија, а камоли пошироко. Очекувањата не само во СДСМ туку и пошироко овој пат се дека завчерашниот опозициски митинг ќе води порано или подоцна кон преобликување на политичкото милје во Македонија. Жестоките обвинувања до Владата, проследени со свирежи на сметка на Груевски и на неговите министри, најпосле стигнаа на вистинската адреса, наместо да се губат во маргиналните термини на телевизиските вести. Собирот на социјалдемократите пред Владата е одговор на обесхрабрувачките анкети за расположението на граѓаните кон опозицијата.

Веќе никој не може да негира дека контурите на македонската политика полека се менуваат како резултат на предизборна треска. Завчерашниот ден покажа колку малку е потребно за управување со политичкото расположение. Несомнено, Црвенковски во иднина добро ќе ја искористи оваа новонаучена лекција и ќе се послужи со сите механизми што му се на располагање за да го засили притисокот врз Владата.

Митингот на социјалдемократите е и долгоочекуван подарок за самата партија и за опозициските кругови во државата. Партиските митинзи, по дефиниција, се собири на истомисленици. Но, ако бидат масовни, тие можат со својата сила и тоа колку да направат проблеми. Митингот на СДСМ завчера беше насочен кон внимателно градениот премиерски имиџ на Груевски како спасител и преродбеник на македонската нација, наспроти контрастот со кој ВМРО-ДПМНЕ го затемнува Црвенковски.

Меѓутоа, дали овој митинг долгорочно ќе го смени политичкото расположение во земјата? На тоа прашање е тешко да се одговори. ВМРО-ДПМНЕ, исто така, е во силна политичка офанзива во изминатиот период. Сепак и покрај тој факт, социјалдемократите завчера покажаа политичка сила што би било наивно доколку ВМРО-ДПМНЕ ја потцени.

Најпосле, се' ќе зависи од истражувањата на јавното мислење во следниот период. Она што е сигурно е дека некои политички чекори на Владата ќе бидат забавени како резултат на завчерашното „гостување“ на социјалдемократите на „Илинденска“ бб.