Фатени лихвари што малтретираа слаткар

Хрватската полиција разби група лихвари во Макарска поради кои минатата година македонскиот слаткар Рамадан Јашари си го одзеде животот. Според хрватскиот портал „Индекс“, уапсени се тројца хрватски и еден државјанин на Македонија, со потекло од Гостивар. Тие се товарат за 29 кривични дела поврзани со лихварство и изнуда, закани, како и наведување на самоубиство и поседување оружје. Како што пишуваат тамошните медиуми, слаткарот, кој е брат на ексзаменик-министер, а сега државен секретар во Министерството за земјоделство, Бесир Јашари, долги години бил цел на криминалната група. По многу притисоци и закани, лихварите му го заплениле целиот имот на Јашари во Макарска, станот и слаткарницата, која во Макарска ја отворил неговиот татко во 1962 година. Откако останал без имотот, Јашари се вратил во Македонија, по што набрзо посегнал по својот живот. (Х.Р.)