Поглед

Кутиите кај Шврговски

Катица Чангова

Кутии полни „криминал“ се истовараат кај државниот обвинител, а секоја нова испорака станува поголема. Дали во доказите има навистина „месо“ или се само гола вода ќе се дознае по неколку месеци.

Спектакл приреди Ване Цветанов пред службените простории на Љупчо Шврговски. Седум кутии „аргументи“ за афери од 120 милиони евра донесе со себе детективот кој трага по валкани пари.

Во стил на филмска ѕвезда која гази по црвен тепих, Ване Цветанов заедно со вредната испорака за обвинителот позираше пред камерите и фотоапаратите. Два пати за три дена новинарите ги пренесоа неговите изјави „дека криминалот бил дело на јавни личности со звучни имиња што ги поддржувале политички партии“.

Тука има нешто збунувачко, дека на Управата која била на пат да открие тежок криминал и' се испречила организирана мафијашка структура со помош на Антикорупциска! Верувале или не, крунскиот доказ за тоа била постапката што ја отвориле борците против корупцијата за директорот Цветанов. Кој ќе поверува дека на мафијата и' требало Антикорупциска, која нема други инструменти освен да поведува иницијативи. Кога на комисионерите им одминуваа скандали пред очи, се критикуваа, кога профункционираа - наеднаш се поврзаа со криминал.

Имаше ли потреба од претставата? Зарем Управата порано не можеше да го извести Обвинителството за перењето пари, туку требаше да пукне случајот со директорот за да извади докази од фиоки. Неверојатна нервоза пројави Ване Цветанов, кој е подготвен да замине од функцијата ако Љупчо Шврговски не ги открие мафијашите што му ги понуди на чинија. Ваквата реакција, како ножот да го сече грлото, или како јамката да се стегнала околу вратот, само потврдува дека фотелјата на Цветанов опасно се ниша.