Кумановец си го одзеде животот скокајќи од Искрин мост
КУМАНОВО - Драган Цветковски (45) од Куманово вчера околу 9,30 часот изврши самоубиство скокајќи од Искрин мост, од височина од 30 метри. Овој мост на реката Пчиња на регионалниот пат Куманово - Свети Николе изминатите години беше кобен за десетина лица, кои од најразлични причини и разочарувања си го одзедоа животот.
Цветковски е косопственик на фирма-стовариште на градежен материјал ,,Европа“ во Куманово. Негови пријатели и познајници претпоставуваат дека мотив за самоубиството се проблемите што се случувале во неговата фирма по несогласувањето со партнерот и долговите што ги имал по основа на хипотекарен кредит тежок три милиони евра.
Телото на несреќниот бизнисмен од водата го извадил риболовецот Сашо Поповски, кој во моментот на инцидентот ловел под мостот.
„Бев шокиран во моментот кога на дваесетина метри од мене во вирот се струполи тело на човек. Веднаш претпоставив дека некој скокна од мостот. Се фрлив во вирот и го извадив човекот. Тој се' уште даваше знаци на живот. Притрчаа и други риболовци во обид за прва помош. Веднаш повикавме Брза помош и случајот го пријавивме во полицијата. За жал, човекот почина додека да стигне возилото на Брза помош“, вели потресен од случајот спортскиот риболовец Поповски. (Ст.Б.) |
