Тивки чистки во владиниот двор

Се најавуваат нови разрешувања и ротирања во редовите на функционерите

Александра М. Митевска


Дваесетина функционери од третиот ешалон на власта се сменети, а барем уште толку допрва ќе заминат од функциите или ќе бидат ротирани, откако премиерот Никола Груевски реши да ги искористи наметнатите околности како изговори за прочистување на владејачките редови. Извори од ВМРО-ДПМНЕ најавуваат дека проветрувањето нема да заврши со разрешувањата, преименувањата и назначувањата што се случија кон крајот на минатата недела. Кадровската чистка во наредниот период, веројатно, ќе ги зафати и редовите на ДУИ, каде што, наводно, веќе подолг период темелно се анализира работата на сите партиски функционери.

Во саботата не се одржа прес-конференција за директорските смени што ден претходно ја најави премиерот Никола Груевски. Тој вчера, во изјава за медиумите, избегна директен одговор и на прашањето дали разрешувањата се вовед во генералка, односно во реконструкција на Владата. „На директорите што ги именува Владата им истекуваат четиригодишните мандати.

Таму каде што ќе процени дека директорот го дал максимумот, тој ќе биде сменет или ќе добие друга функција. Онаму каде што ќе процениме дека директорите се' уште можат да придонесат во работата, ќе им бидат продолжени договорите за уште четири години“, објасни Груевски. Тој се пожали дека има чувство дека што и да направи тоа ќе биде протолкувано како грешка - и ако не смени никого и ако смени некого.

На повеќето директори што беа именувани во 2006 година, кога ВМРО-ДПМНЕ и ДПА ја преземаа власта, навистина им завршуваат мандатите. Но, ако се анализира функционерскиот список што во петокот го лиферуваше Владата, неизбежен е впечатокот дека е поголем бројот на директори кои добиле нови четири години, но и дека на добар дел од разрешените или преименуваните, сепак, не им завршил мандатот.

Ванчо Шехтански, на пример, беше директор на неодамна формираната Агенција за конфискување имот. Упатените велат дека, иако станува збор за агенција во која се вртат многу пари, таа немала речиси никакви услови за работа, така што е тешко да се каже дали префрлањето на Шехтански како директор во Инспекторатот за локална самоуправа е унапредување или деградирање. Прав се крена и околу разрешувањето на Илчо Захариев, кој долги години беше директор на Бирото за лекови и кој важи за многу компетентен во оваа област. Овој потег на Владата веднаш се поврза со политичката заднина на Захариев, кој едно време важеше за кадар на ВМРО-НП. Но, партиски извори велат дека тоа едноставно не држи вода, бидејќи некогашните кадри на ВМРО-НП сега имаат најудобни положби во власта. Благица Новковска, на пример, која своевремено, исто така, беше блиска до ВМРО-НП, овој пат ја задржа директорската позиција во Државниот завод за статистика.

Целата приказна со кадровските чистки, всушност, почна кон средината на летото, кога Ване Цветанов поднесе оставка од директорската функција во Управата за спречување перење пари. Веднаш потоа Владата соопшти дека го разрешува Цветанов, повикувајќи се на барањето на Антикорупциска комисија за негова смена. Станува збор за истата сугестија од Антикорупциска што Владата, претходно, со месеци ја игнорираше и која се однесуваше и на други функционери, кои засега не се на списокот за разрешување. По истиот принцип, ВМРО-ДПМНЕ реши да покаже слух и за инсистирањето на Антикорупциска за решавање на случаите со судир на интереси и со кумулација на моќ кај владејачките функционери, за што претходно, исто така, не беше заинтересирана. Благодарение на партиската директива функционерите да се ослободат од вишокот фотелји се ослободени советнички места за кадри на ВМРО-ДПМНЕ, што беа на кандидатските листи на локалните избори, но тогаш, во согласност со изборните резултати, не освоија мандат во советите на општините. „Тоа беше вистинскиот модел за амортизирање на незадоволството меѓу членството кое во изминатите четири години не ги оствари своите амбиции“, коментира функционер на ВМРО-ДПМНЕ.

Со операцијата наречена „Декумулација на функции“ беа ослободени и дел директорски места во државни институции, од каде што заминаа партиски кадри за кои се процени дека може да дадат поголем придонес како членови или претседавачи во општинските совети. Некои од тие фотелји, како престижната директорска во МЕПСО или директорската во Градската болница во Скопје, допрва ќе се пополнуваат со нови вмровски кадри.

Во наредниот период, според информации што ги објави телевизијата Алсат, може да се очекува смена на заменик-секретарот на Владата, Абдула Азири, на чие место би бил именуван сегашниот заменик-министер за внатрешни работи, Џеват Бучи, чиј, пак, наследник не се открива. Наскоро би требало да се назначи и нов заменик-директор во Управата за јавни приходи, по разрешувањето на Алаудин Зекири, поради злоупотреба на службената должност. Со владина одлука е разрешен заменик-директорот на Агенцијата за вработување, Рахим Лимани, кој решил да остане советник во Град Скопје, а на негово место е назначен Абдулсамет Шабани.

Во изминатите четири години, колку што е на власт, Груевски само еднаш ја реконструираше Владата, кога оставки си поднесоа Ивица Боцевски, Перо Стојановски и Ацо Спасеновски, а Трајко Славески беше разрешен. Во министерскиот состав на ДУИ, пак, воопшто не е интервенирано во последните две години. (А.М.М.)