ЕДИТОРИЈАЛ

Три во едно за гласачката машина

Оливера Војновска

Еден од пратениците го испуштил авионот, друг имал висока температура, а трет бил оправдано отсутен. Заеднички именител е што се дел од власта. „Три во едно“ - и сосема доволно за дебакл на двотретински закон во Собранието. Сепак, нема простор за очајување, владината коалиција е стабилна, а драматиката е дел од политичките шпекулации. Така барем тврди премиерот.

Власта контролира огромно мнозинство во парламентот. Портокаловата коалиција на ВМРО-ДПМНЕ брои 63 пратеници. Заедно со Фијат Цаноски од ПЕИ и 18 парламентарци од ДУИ, Владата може да смета на 82 гласа. Со ваква фантастична поддршка таа во Собранието може да го спроведе секој проект што ќе го посака. Впрочем, тоа постојано се случува во изминативе две и пол години од владеењето на ВМРО-ДПМНЕ и ДУИ. Силната гласачка машинерија во парламентот ја верификуваше буквално секоја владина иницијатива. Не е тајна дека повеќето од пратениците на владиното мнозинство не само што не ги читаат законите туку не знаат ни што гласаат. Изгледа, мислат дека тоа не е ни потребно. Доволно е само да внимаваат да го притиснат зеленото копче. А за секој случај, за да не се збунат, пред чинот на изјаснување координаторот на пратеничката група дава команда: „за“.

Сепак, деновиве го видовме и тоа чудо. За првпат во Собранието не помина закон предложен од Владата. Паднаа законските измени за организација на органите на државната управа. Шефицата на пратеничката група на ВМРО-ДПМНЕ, Силвана Бонева, дојде болна само за да гласа. Се појави и лидерот на ДУИ, Али Ахмети, кој ретко може да се види на пленарните седници, најчесто кога има обраќање на некој странски државник. Но, бадијала, и тоа не помогна. Парламентарното мнозинство не успеа да обезбеди 80 гласа. Недостигаше само еден глас.

Што, всушност, се случи и каде затаи секогаш прецизниот гласачки апарат на власта? Во салата ги немаше пратениците Влатко Ѓорчев од ВМРО-ДПМНЕ, Борис Стојменов од ВМРО-Македонска и Хајрула Мисини од ДУИ. Меѓутоа, тоа беше позната информација. Спикерот Трајко Вељаноски уште во почетокот на седницата ги најави како оправдано отсутни. Нејасно е зошто тогаш го стави законот на гласање ако знаеше дека го немаат потребното двотретинско мнозинство? Дали власта направи грешка при пребројувањето или сметаа на поддршката на тројцата пратеници од Нова демократија? Тие при електронското изјаснување никако не гласаа. Којзнае, можеби во последен момент се премислија, па при јавното прозивање кажаа дека се „против“. Само, овој пат и либералдемократите гласаа „против“. Не и' помогнаа на Владата како неодамна за пакетот системски закони за судството.

Впрочем, за реформите во јавната администрација власта не се ни обиде да го слушне мислењето на опозицијата и на граѓанскиот сектор. Уште помалку да го уважи. Арогантно тргна на јуриш убедена дека целта и' е на дофат. Многу и' се брзаше Министерството за информатичко општество да ги преземе и ингеренциите на Агенцијата за државни службеници.

Административците здивнаа, но само за момент. Власта не се откажува од намерата да ги донесе измените. Според најавите, законот набрзо ќе се врати во Собранието. Формално, како предлог на пратениците од ВМРО-ДПМНЕ и ДУИ за да се избегне деловничкото ограничување - закон што не поминал во парламентот да не може да биде предложен во иста форма и од ист предлагач најмалку три месеци.

Во меѓувреме, пратениците од парламентарното мнозинство ќе го јакнат имунитетот со ударна доза на витамини. Бидејќи, со покачена температура или не, ќе мора да се појават во парламентот и да ја чекаат наредбата за гласање. Членовите на Комисијата за надворешна политика: Теута Арифи, Назим Буши и Васко Шутаров, кои денес треба да се вратат од Турција, никако не смеат да го испуштат авионот. Тие ќе треперат од возбуда дали ќе стасаат навреме за да ги притиснат зелените копчиња.