„Јово, не се враќаме!“

Андов и Поповска не ја прифаќаат поканата на Манасиевски да се вратат во ЛДП

Либералот Стојан Андов и претседателката на ДОМ, Лилјана Поповска, не го сфатиле сериозно повикот на лидерот на ЛДП, Јован Манасиевски, кој на крајот од дебатата за распуштање на парламентот ги покани да се вратат во старото јато. И двајцата сметаат дека Манасиевски тоа го кажал за да биде репликата поинтересна. Сепак, неговите поранешните сопартијци додаваат, дека нема шанси да се вратат во ЛДП.

„Тоа беше кажано на шега, барем така мислам. Ама, којзнае, можеби тој искрено не' повика, но на памет не ми паѓа да се вратам“, кусо ни рече Андов.

И Поповска смета дека Манасиевски тоа го кажал реторички, понесен од атмосферата на седницата и сакајќи да биде што повпечатлив со репликата. „Мислам дека сакаше да има поинтересен настап. Не беше тоа сериозна покана, но и да е така, далеку од умот е да се враќам во ЛДП. Па, јас имам своја партија – ДОМ што е веќе етаблирана“, вели Поповска.

Манасиевски завчера, пред гласањето за барањето за распуштање на Собранието, во контрарепликата до Поповска рече: „Нема европски пример каде што зелените се поврзани со конзервативните партии. Затоа Ве повикувам, вратете се во старото јато и бидете зелено крило на ЛДП. ЛДП ќе биде најголемо изненадување на изборите, ќе излезе со парола: ’Да си оди Груевски, да не се врати Црвенковски‘!“

Потоа истата покана му ја упати и на Андов. „Го почитувам фактот дека сте единствен од таканаречениот фронт што не облече ступидна жолта маичка. Бидејќи, како либерал, знаете дека либералите никогаш не одат во стадо. Затоа и Вас Ве повикувам да им се вратите на своите изворни корени, да го напуштите друштвото на Угриновски и на Црвенковски и, наместо да не' враќате во економски популизам, да одиме во реформи“, рече Манасиевски. Додека тој го повикуваше Андов, поранешниот лидер на ЛДП, Ристо Пенов, кој седеше до Манасиевски, ги крена рацете и прокоментира нешто во смисла: „Е, сега веќе претера!“ (О.В.)