Со мртвите предци против промена на името

Здружението за неменливост ќе се бори за нашето име, јазик и идентитет на името со позитивна енергија создадена од гладување

Здружението за неменливост на името, предводено од биоенергетичарот Ѓорѓи Филев, денеска ќе почне 24-часовен штрајк со цел позитивната енергија што ќе се создаде со гладувањето, помогната со енергијата на нашите мртви предци и на сите живи луѓе во земјава да се насочи кон зачувување на името, македонскиот јазик и идентитет. Седумте члена на организацискиот одбор собрани околу Филев вчера соопштија дека еднодневното гладување со вода, всушност, е првата фаза од енергетското обединување на сите со добри срца и со позитивна енергија што сакаат да и' помогнат на земјата. Втората етапа ќе биде во февруари-март, со штрајк од 48 часа во повеќе градови во земјава, а последната фаза ќе биде во јуни-јули, со штрајк што ќе трае бесконечно и во него ќе се вклучи и дијаспората. Филев, како што рече, имал желба утрешниот настан да се случи во канцеларијата на евроамбасадорот Ерван Фуере, но не сакал „да ја прави работата политичка и против Европа“. Здружението вчера се декларираше како натпартиско, велејќи дека нивна цел не е да се мешаат во политиката. „Ние сакаме да ја сплотиме енергијата на мртвите, на предците и да и' помогнеме на земјата, бидејќи за нас е непојмливо да го смениме името“, рече Филев. Според него, „оној што ќе се дрзне да го смени името ќе биде казнет од природата и неговиот ген ќе биде уништен“. „Колку луѓе, колку наши предци ќе се свртат в гроб ако го смениме името“, праша тој.

За членовите на Здружението причина за штрајкот е „нецивилизираниот притисок, тоа што го има еден народ и тоа што му го дал Господ да му се одземе“. (Т.Г.)