Радомир Антиќ ќе го наследи Јонуз?!

Според извори од Белград, двајца познати менаџери го водат во Скопје досегашниот селектор на Србија

Миодраг Мицковиќ

Веста звучи неверојатно, но во фудбалот се' е можно. Зарем некој веруваше дека еден од најдобрите светски ракометни стручњаци Лино Червар ќе дојде во Македонија и ќе седне на тренерската клупа на малку познатиот во европски размери Металург? Токму затоа, не' замисли кога еден белградски колега во телефонски разговор ни рече дека лесно може да се случи на кормилото на македонската фудбалска репрезентација Мирсад Јонуз да биде наследен од досегашниот селектор на Србија, еден од најпознатите светски фудбалски тренери Радомир Антиќ.

Според информацијата на колегите од Белград, двајца познати менаџери, од кои едниот се обидуваше на чело на македонската репрезентација по заминувањето на Среќко Катанец да го доведе хрватскиот стручњак Бранко Иванковиќ, веќе им навестил на р��ководните луѓе на Фудбалската федерација на Македонија дека постои можност Антиќ да дојде во Скопје, и покрај многуте понуди што ги има од сите страни на светот, кои се обидуваат да го ангажираат Антиќ по неговото заминување од селекторската функција на Србија и неговиот судир со челниците на тамошниот фудбалски сојуз.

Меѓутоа, многу работи ќе зависат од двата наредни меча на нашата репрезентација со Андора и со Русија, од кои ќе зависи судбината на Мирсад Јонуз. Евентуалните порази ќе значат и негов крај на оваа функција, тоа на сите им е јасно, но, сепак треба да се причека до вторник и дуелот со Русите во Скопје, кога многу работи ќе бидат појасни.

Деновиве во дневниот печат се појави и информацијата дека за наследник на Мирсад Јонуз ФФМ го подготвува поранешниот селектор Ѓоко Хаџиевски, кој моментно е тренер во Азербејџан, но тој овие информации ги демантира и тврди дека со него не се водени разговори на таа тема, иако не криеше дека би ја прифатил понудата за селектор само доколку Јонуз се повлече од репрезентацијата.

Радомир Антиќ, доколку дојде до негов ангажман, сигурно би бил најпознатото тренерско фудбалско име што работело во Македонија. Тој беше тренер на Атлетико Мадрид, Сарагоса, Селта, па се' до европските гиганти Барселона и Реал Мадрид.

Интересна е приказната за Антиќ во делот поврзан со Македонија. Во далечната 1969 година, кога беше играч на Слобода од тогашно Титово Ужице, требаше да потпише за Вардар. Тренираше заедно со неговите играчи речиси еден месец, но од непознати причини Вардар се откажа од неговите услуги, ангажирајќи ги Мехо Бајрактаревиќ и Ибро Муратовиќ, исто така играчи на Слобода. Наместо во Вардар, Антиќ замина во Партизан, каде што направи блескава фудбалска кариера, потоа играше за Фенербахче, за Сарагоса и за англиски Лутон.

Во текот на вчерашниот ден се обидовме телефонски да разговараме со него, но неговиот мобилен беше исклучен.