Собранискиот инцидент запечатен со писмa

Тензиите меѓу ВМРО-ДПМНЕ и СДСМ кулминираа со преписка меѓу секретарите на двете партии

Александра М. Митевска


Отворени писма со потписи на секретарите на ВМРО-ДПМНЕ и на СДСМ, меѓусебни обвинувања за загрозување на евроатлантските перспективи на државата, потраги по виновникот за собранискиот инцидент во противничкиот атар... Веќе неколку дена не стивнува пожарот што се разгоре меѓу двете најголеми партии по тензиите што се случија во парламентот откако не беше изгласан законот за стечајците.

Генералниот секретар на ВМРО-ДПМНЕ, Мартин Протоѓер, вчера дотури масло на огнот, испраќајќи му отворено писмо на лидерот на СДСМ, Бранко Црвенковски. Цитирајќи мисли на поранешниот американски претседател - демократот Џон Кенеди, навлегувајќи во лични квалификации, вадејќи секвенци од минатото, не одбирајќи зборови за дискредитација, Протоѓер му порача на Црвенковски дека ќе биде поразен и „во ноември, и по две години, и утре ако треба, и секогаш“. Протоѓер, кој во петокот сакаше да ги смири страстите меѓу парламентарците, па му телефонираше колегата од СДСМ Андреј Петров, сега жестоко го нападна Црвенковски, нарекувајќи го „транзициски ’херој’, кој, извршувајќи државнички функции 15 години, остана да живее во 60-ина квадрати и без автомобил“.

„Ние не го избираме времето во кое живееме, ама избираме како ќе живееме. Но пассаран! Тоа го велат граѓаните. Тоа ме радува. Прочитан е! И тој го знае тоа. Му се гледа во погледот, замижаните очи, несигурното удирање во градите, грчот што го прави кога му дава 1.000 денари на чистачот на чевли. Порано даваше ветувања што не ги остваруваше, сега не дава ниту ветувања“, констатира Протоѓер.

Од СДСМ експресно одговорија со писмо, кое секретарот на партијата, Петров, го адресираше до премиерот Никола Груевски, Протоѓер „и исплашената фамилија инсталирана во ВМРО-ДПМНЕ“, нарекувајќи ги претставници на исфрустрираните и предупредувајќи ги дека повторно ќе ги снајде 2002 година. Петров им порача дека ќе одговараат за криминал и дека треба да си ги спакуваат куферите, бидејќи автомобилот на власта тргнал низ удолница.

„Колку ли сте уплашени за да пишувате вакви гнасотилаци, господа од ВМРО ДПМНЕ? Од каде таква пизма, од каде таков бес, од каде таков нагон за самоун��штување? До кога ќе правите списоци на непријатели? Освен неизбежните за Вас, Црвенковски и СДСМ, секојдневно го проширувате списокот, зависно од Вашето расположение: со меѓународната заедница, медиумите, невладините организации, Уставниот суд, стечајците, професионалните војници, бранителите и кој уште ли не“, забележува Петров.

Судирот на дел пратеници од опозицијата со припадници на МВР, кои ги снимале парламентарците и стечајците во Собранието, викендов прерасна во вербална пресметка меѓу СДСМ и ВМРО-ДПМНЕ, за потоа да кулминира во преписка меѓу секретарите на двете партии. Капак беше прашањето што му го постави еден новинар на вчерашната прес-конференција на Сашко Стефаноски, претседател на Унијата на млади сили на ВМРО-ДПМНЕ. Новинарот праша дали се точни шпекулациите дека пратениците на СДСМ биле под дејство на алкохол кога се случил инцидентот, на што Стефаноски одговори дека слушнал за тоа, но дека немал докази, бидејќи не знае дали на пратениците им е направен алкотест. Претходно, тој ги обвини социјалдемократите дека биле лош пример за младите, бидејќи спроведувале политика на тупаници, наместо на разум. За Стефановски запрепастувачки се информациите дека овој инцидент негативно ќе се одрази врз европските интеграции на Македонија и ќе придонесе земјата да добие негативен извештај. Од СДСМ одговорија со соопштение, посочувајќи дека актуелната Влада и по четири години, не успеала да обезбеди датум за преговори со ЕУ и дека најавите на Стефаноски за уште еден негативен извештај од ЕК се сигнал дека Македонија треба да очекува уште еден пораз под водство на Груевски.

Адвокатски тим на СДСМ ги анализира сите правни детали околу инцидентот во Собранието, по кој опозиционерите ја напуштија тековната седница. Тие, иако велат дека излегле само од седницата, денеска, веројатно, нема да присуствуваат на закажаните комисиски расправи, во очекување партиските тела да ги договорат идните потези како одговор на инцидентот. Од таа одлука зависи и дали социјалдемократите ќе се појават на пленарната собраниска седница закажана за в четврток и дали преку интерпелации ќе побараат одговорност од министерката за внатрешни работи, Гордана Јанкулоска и од првиот парламентарец, Трајко Вељаноски, во кои ја лоцираат политичката одговорност за случајот. Од СДСМ посочуваат дека е прекршен член 43, кој беше вметнат во Законот за Собрание од 2008 година по сугестија на Европската комисија, а по тепачката меѓу пратеници од ДУИ и од ДПА во законодавниот дом. Според таа одредба, во парламентот никој освен интерното полициско обезбедување не смее да влегува и да носи оружје. Ако, пак, е неопходно да се обезбеди засилување од МВР, за тоа би морало да се информираат членовите на собраниското претседателство, вклучително со координаторите на опозициските пратенички групи и потпретседателот на парламентот од редовите на опозицијата. Во случајов, според СДСМ, таа процедура не била испочитувана, бидејќи координаторката Цветанка Иванова и потпретседателот Јани Макрадули не биле известени дека во текот на расправата за законот за стечајците во парламентот ќе бидат присутни полицајци во цивил, кои носеле и пиштоли, иако не се дел од регуларното собраниско обезбедување.

Министерката Јанкулоска, пак, ги ослободи од одговорност припадниците на МВР, кои критичната вечер беа во Собранието. По средбата со нив во Секторот за обезбедување, а откако ги разгледала снимките од безбедносните камери, Јанкулоска побара од опозициските пратеници да се извинат за инцидентот. Таа најави дека за однесувањето на опозицијата ќе бидат известени сите странски амбасади во државата. (А.М.М.)