Претходен број

Името влезе во извештајот на Европскиот парламент

Зелените застанаа на страната на Македонија и гласаа против резолуцијата

Од нашиот дописник
Тони Гламчевски

Стразбур - Европскиот парламент со огромно мнозинство, 601 глас „за“ и 52 „против“, ја усвои резолуцијата за напредокот на Македонија кон Европската унија, изработена според извештајот на холандскиот европратеник Ерик Мејер. Во усвоената резолуција, чие гласање беше откажано пред две недели во Брисел, јасно е побарано од Европскиот совет уште на идниот самит да го процени напредокот на земјата и да утврди, ако е можно тоа, датум за почеток на преговори за членство. Се разбира, ако таа ги исполни осумте приоритети зацртани од Комисијата.

Без сомневање, ова сигурно дека ќе беше главната вест ако во периодот на изработката на извештајот и неговото гласање не се наметнеше проблемот со името на Македонија. Токму и поради овој проблем европратениците од групата на зелените гласаа против резолуцијата, не поради тоа што тие не ја поддржуваат Македонија, туку најмногу поради незадоволството околу компромисните амандмански решенија за преговорите околу името. Имено, групата на зелените отворено застана на страната на Македонија.

„Тоа е проблем што трае со години, потребно е да се пресече ова прашање. Македонија е Македонија и ќе биде Македонија. Грција тоа ќе го прифати, нема разлики. Тоа е како Новиот и Стариот завет“, вели Даниел Кон Бендит од групата на зелените.

Во компромисниот амандман, кој иако ублажен пак не е многу по вкус на грчките европратеници, се вели дека „решението за името е во продолжување на преговорите“.

„Мислам дека извештајот на Мејер е обид да не фрла масло врз огнот, и да се почитуваат малите чекори направени од двете страни“, оцени веднаш по гласањето Дорис Пак, претседателка на Комисијата за Југоисточна Европа при Европскиот парламент.

Ханс-Герт Потеринг, претседателот на ЕП, ни изјави дека не ја знае буквално резолуцијата околу проблемот со името: „Парламентот секогаш се залага за ненасилно решение, ние ги браниме аргументите, не сакаме да има непријателско распол��жение или клима на омраза кога има проблеми или предизвици. Потребно е да се дискутира и да се покаже добра волја. Кога има добра волја, се наоѓа решение“.

Името, значи, официјално не е пречка, ниту нов услов за напредокот на Македонија на патот кон ЕУ, но тоа де факто на еден начин стана предуслов. Тоа ни го потврди Жозеп Дол, претседател на најбројната парламентарна група во ЕП, онаа на народните партии.

„За името е потребно да се најде договор меѓу двете земји. Не може да се продолжи без договор. Сега е потребно да најдеме решение за фамозното прашање за името и тоа колку што е можно побрзо“.

Тој одбива директно да каже дека станува збор за воведување нов, непредвиден услов за членство на една земја во ЕУ.

„Не, да, да! Ви велам дека треба да се најде решение пред една земја да стане членка на Унијата. Ние имаме случаи во кои одевме пребрзо и мислам дека ниту ФИРОМ, ниту Македонија, ниту Нова Македонија, да ги искористам имињата кои се на маса нема да бидат пречка да се најде решение пред нејзиното влегување во Унијата, ниту ќе го блокираат членството. Но, ние треба да побараме да се изнајде решение. Потоа ќе биде полесно“, додава Дол.

Во резолуцијата преовладува мислењето дека многу работи се променети во Македонија и дека таа работи по прашањата за кои беше критикувана. Известувачот ја пофалува земјата за спроведувањето на Охридскиот договор, направените законодавни реформи, за зголемената грижа за малцинствата, сепак, забележувајќи и' за дискриминацијата на Ромите.

Европратениците побараа од властите на Македонија да направат максимум за подготовка на преговорите за членство во Унијата пред крајот на 2008 година. А, не се заобиколени ниту предвремените избори и се нагласува дека владината коалиција ќе гарантира дека изборите ќе бидат правични и демократски во согласност со Изборниот закон.